Il-Union tal-Edukaturi Professjonali – UPE Voice of the Workers hija tassew imħassba dwar il-benesseri tal-membri tagħha wara l-iżviluppi l-iktar riċenti u t-tixrid tal-Covid-19 fil-pajjiżi.
Il-UPE jistenna li l-Ministeru tal-Edukazzjoni jieħu azzjoni fil-pront u jaħdem għall-prevenzjoni tat-tixrid tal-Virus permezz tal-għoti ta’ hand saniters, u sapun adegwat fil-kmamar tal-banju fl-iskejjel.
Il-Union hi tal-fehma li l-awtoritajiet ma jħallux lil studenti jintbagħatu l-iskola b’sintomi simili għall-influwenza sabiex jevita t-tixrid tal-COVID-19 jew kwalunkwe virus relatat li jista’ jkun ta’ detriment għas-saħħa tal-edukaturi tagħna.
Bħala miżura ta’ prekawzjoni, biex tevita t-tixrid tal-virus, l-Union qed toħroġ direttivi lill-membri tagħha li jaħdmu fi skejjel tal-Istat, tal-Knisja u Indipendenti:
- L-edukaturi li huma membri tal-UPE mhux se jassenjaw jew jikkoreġu l-ebda xogħol ta’ tfal morda.
- L-edukaturi li huma membri tal-UPE ma jattendu l-ebda laqgħat tal-massa organizzati mill-iskola bħal Cope Sessions , SDPs, quddies jew Assemblej.
- L-edukaturi li huma membri tal-UPE għandhom jirrappurtaw lill-istudenti li juru sintomi simili għall-influwenza u għandhom iżommu lura milli jżommuhom fil-klassi.
- L-edukaturi li huma membri tal-UPE m’għandhomx jaċċettaw studenti li jkunu ġew minn barra jew li ntbagħtu d-dar mill-iskola, fil-klassi, sakemm ma jkollhomx ċertifikat mediku validu li jiddikjarahom tajbin għall-iskola.
- LSEs li huma membri tal-UPE m’għandhomx jaċċettaw ir-responsabbiltà ta’ sorveljanza ta’ xi tfal li juru sintomi simili għall-influwenza waqt li jkunu qed jistennew li jinġabru mill-iskola minn ġenituri jew kustodji legali.
- L-edukaturi membri tal-UPE għandhom jitħallew jużaw ingwanti kirurġiċi li jintremew wara li jittrattaw materjal jew apparat teknoloġiku tal-istudenti.
