Gowls mill-isbaħ ta’ Jamal Lewis ta rebħa importanti lil Norwich meta għelbu lil Leicester 1-0 f’Carrow Road. Din ir-rebħa tagħti spinta qawwija lill-Canaries fit-tentattiv diffiċli li jsalvaw posthom fil-Premier League. Iż-żewġ timijiet kienu ilhom ma jirbħu minn nofs Jannar, b’Norwich jiksbu biss it-tieni rebħa minn Novmbru li għadda. Leicester issa ilhom erba’ logħbiet mingħajr rebħa fil-kampjonat.
Leicester kienu għoddhom fetħu l-iskor fid-49 minuta b’xutt sabiħ ta’ Kelechi Iheanacho iżda l-gowl tħassar bil-VAR minħabba li ġie interpretat li l-attakkant mess il-ballun b’idu fl-azzjoni. Il-gowl tar-rebħa wasal fis-70 minuta bi kross ta’ Max Aarons li għadda tul il-kaxxa u spiċċa għand Jamal Lewis li b’xutt meraviljuż fil-baxx baram il-ballun għal ġewwa.
