LIJA A. ……………………. 2
ST. GEORGE’S …………. 0
Lija: L. Bonnici, C. Cassar, G. Bugeja (R. Fenech 73’), L. Muscat, D. Scerri, E. Beu, M. Clinch, K. Seakanyeng, C. Giordimaina, F. Temile (H. Wood 84’), C. Gauci.
St.George’s: L. Mifsud, A. Hili, L. Bonett, D. Caruana, A. Mallia, B. Leute Dias (M. Uritani 70’), G. D’Amato, R. Villada Patino, G. Carabott (I. Camilleri Pirotta 55’), J. Grech, A. Marshall.
Referee: Sandro Spiteri
Erjon Beu sar l-aqwa skorer ta’ kull żmien tal-kampjonat tal-Ewwel Diviżjoni meta skorja l-102 gowl biex qabeż ir-rekord ta’ Simon Shead li skorja 101 gowl f’din il-kategorija. Beu fetaħ l-iskor wara kwarta logħob biex mexxa lit-tim tiegħu lejn ir-rebħa kontra St. George’s biex Lija żammew l-ewwel post tal-klassifika. Il-logħba ftit kien fiha storja, fejn Lija ddominaw l-ewwel parti u wara ħallew l-inizjattiva f’idejn l-avversarji li iżda m’approfittawx.
Lija ħarġu fuq l-attakk u resqu qrib bi free-kick ta’ Seakanyeng li għadda ftit barra. Fis-16-il minuta Lija fetħu l-iskor b’azzjoni bejn Seakanyeng u BEU, b’dan tal-aħħar jispara fix-xibka minn qagħda angolata biex skorja l-24 gowl tiegħu.
Minuta wara azzjoni oħra tajba ta’ Lija bix-xutt fil-baxx ta’ Temile jgħaddi ftit ċentimetri bogħod minn sieq il-lasta. Fis-37 minuta Lija skorjaw it-tieni gowl b’azzjoni veloċi ta’ SEAKANYENG li antiċipa l-ħarġa tal-gowlkiper u skorja f’lasta vojta. Seakanyeng beda jkun xewka fid-difiża ta’ St.George’s u fit-42 minuta qabeż diversi avversarji qabel żmarka lil Temile li dam xi ftit jaħsibha u l-azzjoni tiegħu kienet imblukkata.
Fit-tieni taqsima Lija ħallew xi ftit l-inizjattiva lill-avversarji li bdew attakkaw iżda mingħajr wisq konvinzjoni u għalhekk il-leaders ftit kellhom problemi biex jipproteġu l-vantaġġ. St. George’s spiċċaw ukoll il-logħba b’għaxar plejers wara li l-attakkant Dylan Caruana dabbar it-tieni karta safra fis-87 minuta.
Fgura jirbħu logħba spettakolari
MQABBA ………………………… 3
FGURA U. ……………………….. 5
Mqabba: F. Tabone (J.M. Vella 73’), M. Caruana (B. Grech 31’), D. Micallef, A. Ferreira, K. Magro, J. Micallef, E. Sala (Y. Omuro 87’), G. Micallef, P. Chimezie, F. Zammit, K. Xuereb
Fgura: B. Bartolo, P. Chircop (S. Hili 66’), J. Stenson, J. Barbara, S. Abela (T. Grech 76’), D. Cartella (D. Quintero 86’), G. Martin, C. Gandini, J. Vella, A. Toncheff, G. Galea
Referee: Ezekiel Barbara
Fgura United għelbu lil Mqabba 5-3 f’logħba kważi decider bejn żewġ timijiet li flimkien ma’ Vittoriosa u St.George’s jinsabu fl-aħħar post tal-klassifika. Il-logħba kienet spettakolari bit-tim ta’ Mqabba jkollu l-mertu kbir li baqa’ jissielet sal-aħħar u dan minkejja li lagħab għal taqsima sħiħa bi plejer inqas.
Fl-ewwel azzjoni denja wara tmien minuti Fgura marru fil-vantaġġ, meta minn azzjoni ta’ korner id-difiża ta’ Mqabba ma neħħietx il-periklu u minn żewġ passi bogħod kien ALEJANDRO TONCHEFF li xeħet il-ballun fix-xibka. Mqabba ppruvaw iwettqu reazzjoni iżda kienu xi ftit konfużi u kienu iktar effettivi Fgura bil-kontrattakki tagħhom li bdew ikunu ta’ theddida. Fit-23 minuta minn azzjoni ta’ korner il-gowlkiper ta’ Mqabba kellu ħarġa difettuża iżda wara rmedja sew meta salva b’mod brillanti ix-xutt ta’ Cartella.
Fit-32 minuta Fgura rduppjaw meta f’azzjoni ta’ kontrattakk CARTELLA qata’ lid-difiża avversarja u b’lob preċiż xeħet il-ballun fix-xibka. Biex tkompli tiġi ħażina għal Mqabba fit-43 minuta Kurt Magro dabbar it-tieni karta safra u b’hekk Mqabba kellhom jilagħbu l-kumplament tal-logħba bi plejer inqas.
Mqabba kellhom bidu tajjeb fit-tieni taqsima u fit-52 minuta naqqsu l-iskor meta minn azzjoni ta’ korner kien FABRIZIO ZAMMIT li għola fuq kulhadd u bir-ras xeħet fix-xibka. Fis-67 minuta Mqabba għamlu l-iskor indaqs meta f’azzjoni mill-aqwa ta’ kontrattakk kien FERREIRA li b’lob stupend għamel l-iskor indaqs.
Minuta wara Fgura reġgħu marru fil-vantaġġ meta mil-lemin Cartella qassam lejn SERGIO HILI li kien għadu kif daħal bħala sostitut u dan skorja b’xutt fil-baxx. Iżda Mqabba kienu determinati għaliex żewġ minuti wara Chimezie twaqqa’ fil-kaxxa u mill-11-il metru kien l-istess PAUL CHIMEZIE li spara l-ballun fix-xibka.
Wara dan il-gowl kienu iktar Mqabba perikolużi iżda fit-83 minuta kienu Fgura li għal darb’oħra marru fil-vantaġġ meta GIOVANNI GALEA għeleb in-nasba tal-offside u spara fix-xibka. Mqabba komplew jattakkaw iżda Fgura għalqu l-logħba fl-94 minuta meta s-sostitut QUINTERO daħal tajjeb fil-kaxxa u x-xutt fil-baxx tiegħu għeleb lil Vella u kien id-difensur Brandon Grech li kompla l-ballun għal ġewwa f’attentat li jikklerja.
