Gowl lejn l-aħħar tal-ewwel taqsima u ieħor fil-bidu tat-tieni taqsima kienu biżżejjed biex Arsenal għaddew mal-aħħar tmienja tal-FA Cup b’rebħa ta’ 2-0 kontra Portsmouth fi Fratton Park. Din hi l-ewwel darba fi tliet staġuni li Arsenal waslu f’din il-fażi tal-kompetizzjoni. Aktar minn hekk l-FA Cup tirrappreżenta l-unika ċans ta’ Arsenal li jirbħu unur f’dan l-istaġun wara li l-ġimgħa l-oħra kienu eliminati mill-UEFA Europa League.
Il-manager Mikel Arteta għamel total ta’ disa’ bidliet mill-aħħar logħba fosthom ta d-debutt lid-difensur ċentrali Pablo Mari. Id-differenza bejn iż-żewġ timijiet kienet evidenti iżda nota negattiva għal Arteta kienet l-injury ta’ Lucas Torreira li kellu jittieħed bi stretcher u ġie mibdul minn Dani Ceballos.
Arsenal fetħu l-iskor fil-ħin miżjud tal-ewwel taqsima bi kross mil-lemin ta’ Reiss Nelson isib lil Sokratis Papastathopoulos li b’xutt mill-ewwel ma tax ċans lil Alex Bass. Il-Gunners irduppjaw fil-51 minuta meta Nelson tefa’ kross ieħor mil-lemin lejn Edward Nketiah li b’xi mod żamm il-ballun fil-kontroll tiegħu u skorja mill-qrib.
FA Cup
Kwarti tal-finali
Illum: Portsmouth v Arsenal 0-2
Għada: Chelsea v Liverpool 8.45pm, Reading v Sheffield United 9.00pm, WBA v Newcastle 9.00pm
L-Erbgħa: Leicester v Birmingham 8.45pm, Sheffield Wednesday v Manchester City 8.45pm, Tottenham v Norwich 8.45pm
Il-Ħamis: Derby v Manchester United 8.45pm
