Il-familja ghal Charlie kienet kollox. Kienu kuntenti li qishom reġgħu saru għarajjes u issa qed igawdu aktar lil xulxin wara li rabbew u kabbru b’tant għożża liż-żewġ uliedhom.
Kliem Adrian Mallia – Operations Manager fi ħdan il-Malta Freeport Terminals – meta pprova jiddeskrivi lil Charlie Pace, ir-raġel ta’ Miriam, li t-Tnejn filgħaxija tilfet ħajjitha maqbuda taħt it-tifrik tar-residenza tagħhom fil-Ħamrun.
Mallia jkompli li fuq xogħolu, Charlie kien jitkellem ħafna mal-kollegi tiegħu dwar il-familja u kemm din kienet għal qalbu.
U lil Miriam, hu jfissirha bħala mara li kienet dejjem bi tbissima fuq wiċċha u li dejjem lesta tgħin lil ħaddieħor.
Anke Ronnie Tonna – wieħed mill-ġirien tal-familja Pace – jiddeskrivi lil Miriam u Charlie bħala koppja li għenu liż-żewġ uliedhom jikbru f’ambjent san ta’ familja.
Tonna jispjega illi Miriam fil-ħin tal-inċident kienet qed tħejji l-ikel għal Charlie, li kien wasal biex jispiċċa mix-xogħol.
Ronnie jispjega x-xena xokkanti appena ġġarrfet id-dar, b’martu tispjega li semgħet ħoss qawwi daqslikieku xi terremot.
U f’leħħa ta’ berqa, l-aħbar li residenza ġġarrfet fil-Ħamrun waslet anke fil-Freeport. U mill-ewwel indunaw li l-post jinsab qrib ir-residenza tal-Familja Pace.
Iżda r-ritratti fuq il-media soċjali neħħew kull dubju li forsi wieħed seta’ kellu …
Imbikkem, Adrian Mallia jirrakkonta l-ftit kliem li rnexxielhom jgħidu lil xulxin … hu u Charlie.
Adrian jispjega li baqa’ qrib Charlie sakemm il-katavru ta’ Miriam ittella’ bla ħajja minn qalb it-tifrik.
Dan kollu kien xokk kbir, anke għall-kumplament tal-kollegi fil-Freeport … li fi kliem Adrian Mallia dejjem ħadmu bejniethom daqslikieku familja waħda.
Għaldaqstant, f’isem sħabu, hu tenna l-messaġġ nazzjonali ta’ solidarjetà għal Charlie u l-familja tiegħu.
Kliem ta’ appoġġ ukoll mill-ġirien, kif itemm Ronnie Tonna.
