Xi ħaġa falliet. Krollat residenza, u kellna vittma. Qal dan il-Prim Ministru Robert Abela meta kien mistoqsi mill-ġurnalisti dwar min għandu jġorr responsabbilta’ għal dak li ġara; ir-raba’ binja li ġġarrfet f’inqas minn sena u li din id-darba ħalliet mara maqtula taht it-terrapien.
Iżda filwaqt li jgħid li xi ħaġa falliet, Robert Abela baqa’ jinsisti li m’hemmx nuqqas min-naħa tal-Istat. F’artiklu fuq blog lokali, il-Prim Imħallef Emeritu u Mħallef fil-Qorti Ewropea għad-Drittijiet tal-Bniedem Vincent DeGaetano qal li l-Istat għandu obbligu li jipproteġi l-ħajjiet tal-persuni fi djarhom. Iżda filwaqt li jaqbel li jeżisti dan l-obbligu, il-Prim Minstru irrepeta dak li qal fil-Parlament …li m’hemmx nuqqas min-naħa tal-Istat.
Il-PM, minflok jaghzel it-triq tad-djalogu, qed jghid li ma jaqbilx mal-proposta tal-Kap tal-Oppożizzjoni Adrian Delia li jitwaqqaf Kumitat Parlamentari bil-kontribut tal-Kamra tal-Periti biex jiddiskuti t-triq ‘il quddiem. Hu qal li mhux lok tal-Parlament li jidħol fil-kwistjoni.
Minflok se jaħtar grupp hu stess biex jagħmel riforma tar-riforma. Il-Parlament imbagħad jiddiskuti l-konklużjonijiet.
Meta mistoqsi mill-ġurnalisti, Robert Abela wieġeb li sadanittant m’hemmx lok għal sospensjoni fix-xogħol tal-kostruzzjoni sakemm issir din ir-reviżjoni.
