L-Awstrija, mil-lum, qed tipprojbixxi l-laqgħat għal gruppi ta’ aktar minn ħames persuni waqt li qed jiżdiedu l-isforzi għal kontra l-coronavirus (Covid-19) fl-Ewropa.
Il-Kanċillier Awstrijak, Sebastian Kurz, ħeġġeġ biex in-nies jiżolaw lilhom infushom, bl-iskejjel u l-parti kbira tal-ħwienet fl-Awstrija mhumiex se jiftħu mil-lum.
Ir-Rumanija, li għandha 123 każ tal-marda, mistennija tiddikjara stat ta’ emerġenza. Dan waqt li l-Prim Ministru tar-Repubblika Ċeka, Andrej Babis, kien qed jaħseb biex jipproponi lill-Gvern fi Praga biex il-pajjiż sħiħ jitqiegħed taħt kwarantina. Ir-Repubblika Ċeka u s-Slovakkja diġà għalqu l-fruntieri meta l-Ewropa saret ‘l-epiċentru ġdid’ tal-pandemija.
L-aħħar miżuri qed isegwu l-istrateġiji drastiċi, fi tmiem il-ġimgħa, min-naħa ta’ Franza u Spanja – madankollu, illum saru xorta l-elezzjonijiet lokali fi Franza minkejja l-għeluq tal-kafeteriji, ir-ristoranti u l-parti kbira tal-ħwienet fil-pajjiż partikulari.
L-istat tal-emerġenza fi Spanja (b’kaġun tal-coronavirus) mistenni jdum tal-anqas ġimagħtejn – bil-Parlament jista’ japprova estensjoni taż-żmien f’każ li jkun neċessarju. Spanja, b’161 mewta, hi l-agħar pajjiż Ewropew milqut mill-Covid-19 wara l-Italja.
Il-Prim Ministru ta’ Franza, Edouard Philippe, talab lin-nies biex inaqqsu l-vjaġġi, speċjalment bejn l-ibliet. Dan meta Franza, fi tmiem il-ġimgħa, irrappurtat żieda qawwija fl-infezzjonijiet għal akar minn 4,400.
