Minkejja l-miljuni li Steward qed jingħataw kull sena, mit-taxxi tal-Maltin, St Luke’s huwa sptar li ma jistax jintuża għall-pazjenti, issa li f’Malta il-każijiet tal-COVID-19 qed ikomplu jizdiedu.
Minkejja li l-Prim Ministru Robert Abela baqa’ qatt ma ammetta dan, il-Ministru tas-Saħħa Chris Fearne minn naħa tiegħu ammetta li f’San Luqa d-deal tal-Gvern falla. Dan meta l-Ħamis kien qed jindirizza lill-media.
Kieku l-€240 miljun li ngħataw lil Vitals u Stewards issarrfu f’investiment reali, kieku l-isptarijiet jinsabu lesti u ppreparati għal kull eventwalità. U issa, ġejna bżonn sptar ieħor pre-fabricated li se jsir fil-parkeġġ ta’ ħdejn Mater Dei.
L-applikazzjonijiet għal dan il-proġett ħarġu u għalqu f’temp ta’ tliet ijiem – fatt li ħoloq dubji serji, tant li din il-ġimgħa stess issemma’ fil-Parlament anke mill-Kap tal-PN Adrian Delia.
Id-dubji komplew jiżdiedu wara li fl-aħħar sigħat, Chris Fearne ħabbar li dan il-proċess għalissa kellu jitwaqqaf.
Il-Partit Nazzjonalista ilu xhur jinsisti li Steward qed jitolbu l-miljuni meta ma wettqux l-obbligi tagħhom ta’ modernizzar u investiment fl-isptarijiet.
Kuntrarju għal dawn il-manuvri kollha, il-Kap tal-Partit Nazzjonalista Adrian Delia dejjem tkellem dwar punt ċar ħafna fejn għadu jinsisti li l-isptarijiet jirritornaw għand in-nies, tant illi anke fetaħ waħdu kawża l-Qorti.
