Spanja rreġistrat 864 mewta oħra mill-coronavirus. Dan kien il-ħames jum konsekuttiv li dan il-pajjiż ikkonferma ‘il fuq minn 800 vittma għal perjodu ta’ 24 siegħa.
L-aħħar ċifra, fil-fatt, waqqfet rekord ġdid (fi Spanja) għall-ammont ta’ mejtin mill-Covid-19 għal ġurnata partikulari.
Il-pajjiż għandu t-tieni l-akbar numru ta’ każi mill-coronavirus (102,136) wara l-Italja u issa sar ukoll it-tielet pajjiż ( wara l-Italja u ċ-Ċina) li rrapporta ‘il fuq minn 100,000 każ ta’ infezzjoni konfermati … ‘Tragward’ negattiv ieħor f’dan iż-żmien diffiċli.
Nhar it-Tlieta kienu mietu 849 persuna mill-effetti tal-coronavirus fi Spanja, li sa dak il-jum — skont il-Ministeru tas-Saħħa f’Madrid – kellha 94,417 każ ta’ infezzjoni.
Sadanittant, il-Gvern Spanjol qed jittama li r-restrizzjonijiet riġidi għall-ħajja pubblika li jridu jkomplu, almenu, sal-Għid il-Kbir, kapaċi jnaqqsu l-firxa tal-coronavirus.
Min-naħa tagħha, l-Organizzazzjoni Dinjija tas-Saħħa (WHO) qed issejjaħ biex il-Gvernijiet jinsistu bil-miżuri għall-kontroll tal-pandemija, fost stqarrija li l-kontrolli għall-movimenti tan-nies, fl-Ewropa, ‘qed jibdew iħallu effett’.
Mike Ryan, il-kap tat-taqsima għall-emerġenzi tas-saħħa mal-WHO, qal li ‘it-tama ferventi ta’ kulħadd’ hi li Spanja u l-Italja – iż-żewġ epiċentri tal-pandemija fl-Ewropa – issa waslu jew qegħdin qrib ‘l-ogħla livell tal-kurva’.
Dan waqt li l-WHO kompliet tħeġġeġ biex il-pajjiżi jżidu l-isforzi tal-contact tracing biex jinstabu u jkunu iżolati aktar pazjenti.
