Idealment jekk persuna tgħix ma’ persuna anzjana ‘il fuq minn 65 sena jew persuna vulnerabbli, inkluż mara li qed tistenna tarbija, tfittex post ta’ residenza oħra.
Hekk stqarr il-Ministru fl-uffiċju tal-Prim Ministru Carmelo Abela waqt li kien qed iwieġeb domandi ta’ NET NEWS waqt konferenza stampa li saret fuq pjattaforma diġitali. Huwa saħaq li dawk il-persuni li ma jistgħux jaħdmu fuq bażi ta’ teleworking u jaqsmu r-residenza tagħhom ma’ anzjani u nies vulnerabbli jridu joħorġu għax-xogħol.
Il-Ministru Abela għaldaqstant ta’ x’jifhem li għalissa dawk il-persuni li ma jridux jew ma jistgħux imorru għax-xogħol sabiex jieħdu ħsieb lil dawn in-nies li jaqgħu taħt din il-faxxa, jew ankè sforz il-biża’ li jdaħħlu l-pandemija taħt is-saqaf ta’ darhom – m’humiex intitolati li jiġu mgħejjuna minn kwalunkwè pakkett finanzjarju għax skont il-Gvern din mhux raġuni valida biżżejjed.
Il-Ministru saħaq li bħala prekawzjoni, ġaladarba ma jistgħux imorru jgħixu f’residenza oħra – dawn il-persuni idealment jużaw kmamar tal-banju differenti, ma joqgħodux qrib il-persuni li jaqgħu taħt din il-faxxa u jżommu attenzjoni kemm jistgħu fuq il-post tax-xogħol.
Tul din il-konferenza tal-aħbarijiet ingħad ukoll li bħal ma’ tħabbar fil-jiem li għaddew, il-Gvern ser ikun qed iħallas €800 bħala leave tal-kwaratina lill-kumpaniji privati l-aktar affettwati minn din il-kriżi għal kull full timer li jħaddmu. Ġaladarba l-impjegat jitħallas aktar minn €800, in-negozji jridu jżidu sa minimu ta’ €400 fil-paga, jiġifieri ħaddiem jista’ jitħallas sa minimu ta’ €1,200 bħala leave tal-kwaratina.
Dan ifisser li ħaddiema li kienu jaqilgħu ‘il fuq minn €1,200 – il-probabilità hija li inevitabbilment ser titnaqsilhom momentarjament il-paga.
Il-Ministru Abela sostna li f’każ li l-kumpaniji ma jkunux jifilħu jżidu mat-€800 kif stipulat fil-ftehim dawn għandhom jagħmlu immedjatament kuntatt mad-Dipartiment tar-Relazzjonijiet Industrijali u Impjieg sabiex jitolbu permess biex imorru kontra l-ftehim.
F’każ li għal xi raġuni jew oħra impjegat jara li mhux jitħallas dak li huwa bi drittu sa massimu ta’ €1,200 – għandu wkoll jagħmel kuntatt mill-aktar fis mad-DIER.
Fid-dawl ta’ dan kollu, twaqqaf ukoll helpline miftuħ mit-Tnejn sal-Ġimgħa bejn 0800 u 1600: 1575 għall-ħaddiema filwaqt li 1576 għal min iħaddem.
Carmelo Abela sostna li l-pubbliku jrid jifhem li f’dawn iċ-ċirkostanzi kulħadd irid jagħmel s-sagrifiċċji bi tbatija mqassma ma’ kulħadd.
Meta mistoqsi minn din il-Kamra tal-Aħbarijiet dwar x’ser isir mill-għajnuniet soċjali viz-a-vis ħaddiema fis-settur parastatali (bħall-AirMalta), il-Ministru Abela farfara li mhux kompitu tiegħu, iżda tad-Dipartiment Soċjali.
//= $special ?>