Atletico Madrid ikkonfermaw li l-eks kowċ tagħhom Radomir Antic miet fl-età ta’ 71 sena. Il-gazzetta Spanjola AS qalet li Antic miet kawża ta’ komplikazzjonijiet fl-istonku. Bħala kowċ, Antic mexxa diversi timijiet Spanjoli nklużi Real Zaragoza, Real Madrid u Barcelona. Bla dubju li l-aħjar żmien tiegħu kien il-ħames snin li għamel bħala kowċ ta’ Atletico Madrid fejn fosthom rebaħ La Liga u t-Tazza tar-Re fl-1996. Antic hu l-uniku kowċ li mexxa l-aqwa tliet timijiet ta’ Spanja.
Hu mexxa wkoll lit-tim nazzjonali tas-Serbja biex ikkwalifikat għat-Tazza tad-Dinja tal-2010. Imbagħad kompla l-karriera fiċ-Ċina bl-aħħar esperjenza tiegħu tkun fl-2015 fis-Super League ma’ Hebei China Fortune. Antic kellu wkoll karriera ta’ 17-il sena bħala plejer. L-eks difensur lagħab ma’ Partizan Belgrade, Fenerbahce fit-Turkija, Real Zaragoza fi Spanja u temm il-karriera ma’ Luton Town fl-Ingilterra.
