Il-Ministru tal-Isport Russu, Oleg Matytsin qal li l-qorti m’għandiex tiddeċiedi kontra r-Russja fl-appell tagħha b’rabta mas-sanzjoni minħabba d-doping. Ir-Russja qed tappella minn sospensjoni ta’ erba’ snin, fejn ma tistax tikkompeti f’avvenimenti mondjali u internazzjonali fosthom fl-Olimpjadi. Din is-sanzjoni kienet imposta wara li l-WADA sabet li r-Russja ffalsifikat riżultati tad-doping.
Il-każijiet quddiem il-CAS ġew posposti minħabba l-pandemija tal-coronavirus. Matystsin kompla li dawk li se jieħdu d-deċiżjoni jridu jifhmu li r-realtà tal-lum hija differenti. Il-problemi tar-Russja b’rabta mad-doping imorru għas-sena 2015 wara li rapport tal-WADA kien sab li l-Gvern Russu kien għen lill-atleti Russi jieħdu sustanzi illeċiti. Dakinhar l-aġenzija Russa ta’ kontra d-doping flimkien mal-federazzjoni tal-atletika kienu ġew sospiżi.
