“Il-valur tal-ħajja huwa fundamentali, irrispettivament tar-razza u l-kulur tal-ġilda. Ejja ma nimxux lejn il-linja ta’ ħsieb li kulħadd u kollox għandu prezzu bil-konsegwenza li l-valuri jitwarrbu”.
Dan kien l-appell lill-awtoritajiet tal-Assoċjazzjoni Maltija għall-Professjoni tal-Counselling (MACP) fejn fi stqarrija ingħad li l-MACP hija konxja tar-realtajiet diffiċli li bħalissa ċ-ċittadini għaddejjin minnhom f’dawn iż-żminijiet tista’ tgħid surreali.
Għal bosta fl-aħħar ġimgħat il-ħajja normali tagħhom ġiet għal kollox imfixkla minn ansjetà kbira kemm minħabba l-inkwiet fuq is-saħħa, kif ukoll dwar l-instabbilità finanzjarja. Madanakollu, kompliet l-Assoċjazzjoni, f’pajjiżna hawn professjonisti li lesti jgħinu lill-publbiku ġenerali f’dan iż-żmien ta’ paniku.
L-MACP kompliet tgħid li madanakollu, minkejja li ninsabu fis-sena 2020 mhux kulħadd igawdi minn dan il-lussu. Huma saħqu li f’dan iż-żmien delikat bħala poplu għandna aktar nifmhu d-drittijiet fundamentali tal-bniedem.
Ġie spjegat li waqt konfenzjoni għall-protezzjoni tal-minoritajiet lura fl-1998, Malta, fi ħdan il-Kunsill tal-Ewropa, ffirmat għal tolleranza u djalogu interkulturali. Fi kliem sempliċi – sabiex ikun hemm ir-rispett u l-koperazzjoni fost dawk kollha li jgħixu fit-territorju Malti – irrispettiv mill-etniċità, lingwa u twemmin.
Għaldaqstant l-Assoċjazzjoni appellat għal djalogu aktar miftuħ f’pajjiżna u appellat ukoll għal soċjetà aktar miftuħa bil-għan li f’din il-kriżi pandemika li sibna ruħna fiha ma jkomplux jiżdiedu l-emarġinati f’pajjiżna.
