Minkejja li bħalissa l-poplu Malti u Għawdxi għaddej minn żmien diffiċli kawża tal-pandemija, bosta persuni jipprovaw jagħmlu milli jistgħu biex jaljenaw rashom u jferrħu t-tfal li issa ilhom il-jiem maqfula d-dar wara li twaqqfet ħesrem l-iskola.
Hekk seħħ il-Ħadd filgħaxija proprju fi Triq il-Brunzar, f’Santa Venera. B’kollaborazzjoni mar-residenti tat-triq, ġie organizzat street party bil-preżenza wkoll ta’ DJ.
Ritratti mibgħuta lil NET NEWS urew residenti jifirħu u jiċċelebraw fil-gallariji rispettivi tagħhom kif ukoll mill-bjut. Din l-inizjattiva serviet bħala jum b’differenza għall-anzjani u t-tfal fi triq li ta’ kuljum, inevitabbilment, jaf għaddejjin minn żminijiet xejn faċli.
Dan għandu jservi ta’ eżempju fejn f’dawn iż-żminijiet wieħed jagħmel milli jista’ sabiex mhux biss jaħseb fih innifsu iżda f’ħaddieħor ukoll bħal ma għamlu l-Vendriżi ta’ Triq il-Brunzar.
