“Is-CEO tal-AirMalta jifdallu €90,000 fis-sena u lil bdoti jrid itihom €1,200 fix-xahar”
Il-bdoti Ewropej huma ferm inkwetati bid-deċiżjoni li jitkeċċew 108 bdot minn mal-Air Malta minħabba l-kriżi ta’ Covid-19.
Dan intqal f’ittra miktuba mill-European Cockpit Association indirizzata lill-Prim Ministru Robert Abela u l-Ministru Silvio Schembri. L-ECA saħqet li tinsab diżappuntata li l-Air Malta ma għamlitx bħal bqija linji tal-ajru Ewropej, jiġifieri li ggarantixxu li l-bodit kienu ser jitħallsu bejn 55% u 90% tal-paga kurrenti tagħhom tul din il-kriżi.
L-Assoċjazzjoni Ewropea sostniet li dan l-aġir huwa ta’ min jistmerru hekk kif l-linja tal-ajru falliet milli tipproteġi lill-impjegati tagħha f’dan il-mument tant delikat. Huma saħqu li l-bdoti tal-Air Malta taw taħriġ lil numru kbir ta’ bdoti oħra madwar il-globu u issa qed jiġu trattati b’dan il-mod. Għaldaqstant, l-ECA appellat lill-Gvern sabiex f’dan il-mument tant delikat jiggarantixxi lill-bdoti tal-Air Malta persentaġġ deċenti ta’ paga.
Dan kollu jmur kontra l-appelli Ewropej
Huma saħqu li t-tkeċċija eventwali tal-bdoti mhux biss tmur kontra l-ħidma tal-Unjoni Ewropea iżda ankè tkun ta’ ostaklu għall-ġirja ekonomika wara li l-pandemija tgħaddi.
L-ECA insistiet li din is-sitwazzjoni ta’ kriżi m’għandhiex tintuża għal skopijiet aħħarija oħra min-naħa tal-Gvern. Ġie spjegat li l-bdoti lesti jerfgħu l-piż tagħhom, ġaladarba kulħadd jaqsmu magħhom.
Fi stqarrija l-Assoċjazzjoni tal-Bdoti tal-Air Malta saħqet li l-Unjoni Ewropea qed tipprovdi t-triljuni ta’ ewro sabiex ma jintilfux l-impjiegi iżda l-management tal-linja tal-ajru nazzjonali qed ifittxu l-opportunità ideali għad-detriment tal-ħaddiema.
L-ALPA saħqet li filwaqt li l-bdoti huma mistennija li titnaqsilhom l-paga drastikament, hija allegat li s-senior management ser ikollhom tnaqqis ta’ 10% biss mill-paga tagħhom.
“Jekk inaqsulu 70% tal-paga jifdallu €7,500 fix-xahar – u lil bdoti jridu jtuhom €1,200”
Huma saħqu li s-sagrifiċji li qed jiġu mitluba jagħmlu l-bdoti tal-Air Malta jridu jsiru minn kulħadd. L-ALPA saħqu li l-Kap Eżekuttiv tal-Air Malta Clifford Chetcuti ġie kkwotat jgħid li lest joffri s-70% tal-paga tiegħu – dan ifisser li bi 30% ser jifdallu aktar minn €90,000 fis-sena – ekwivalenti għal €7,500 fix-xahar.
Dan kollu filwaqt li lill-bdoti jridu jisfurzawhom jaċċettaw paga ta’ €1,200 fix-xahar mingħajr lanqas biss jiggarantulhom s-sigurtà tax-xogħol.
