L-Oppożizzjoni tesprimi t-tħassib tagħha ghal dak li qieghed isehh f’pajjiżna fil-qasam tas-settur finanzjarju fid-dawl ta’ rapporti ppubblikati kemm mill-Fond Monetarju Internazzjonali kif ukoll mill-Financial Action Task Force dwar il-ħidma fil-glieda kontra il-ħasil ta’ flus.
Fi stqarrija iffirmata minn; Mario de Marco, Kelliem tal-Oppożizzjoni għall-Finanzi, Claudio Grech, Kelliem tal-Oppożizzjoni għall-Ekonomija, Kristy Debono, Kelliema tal-Oppożizzjoni għall-Investiment Ekonomiku u Negozji Żgħar, s-Servizzi Finanzjarji u l-Aċċessibbiltà għall-Fondi u Budget Ewropej u Karol Aquilina, Kelliem tal-Oppożizzjoni għall-Governanza Tajba, Tisħiħ tad-Demokrazija, għaċ-Ċittadinanza u r-Riforma tas-Servizz Pubbliku – intqal li minkejja li diġà għaddew seba’ xhur mit-terminu ta’ sena li l-Kunsill tal-Ewropa, permezz tal-Moneyval, ta lill-pajjiżna biex jirranġa s-sitwazzjoni prekarja fil-qasam tal-ħasil ta’ flus, il-Fond Monetarju Internazzjonali reġa’ fl-aħħar jiem wissa li jekk pajjiżna ma jindirizzax in-nuqqasijiet deskritti bħala notevoli fir-rigward tal-ħasil ta’ flus, dan se jkun ta’ theddida għall-istabbilità finanzjarja ta’ Malta.
Il-possibbiltà li Malta tispiċċa fuq il-lista l-griża jekk ma tieħux l-azzjonijiet meħtieġa, jista’ jkollu impatt fuq l-ekonomija u l-impjiegi ta’ pajjiżna – dan fi kliem l-IMF.
L-istess rapport jesprimi dubji fuq l-awtoritajiet regolatorji ta’ pajjiżna li jindirizzaw din l-isfida bis-serjetà, aktar u aktar meta pajjiżna qed jipprova jattira lejn xtutna negozji meqjusa aktar riskjużi li joperaw fil-qasam ta’ assi virtwali u prodotti simili.
Iktar ta’ tħassib hu li gie rappurtat minn gurnal lokali li ikkwota sorsi fi ħdan il-Gvern, li s’issa ma ġewx miċħuda. Skond dan ir-rapport, il-Gvern qed jikkunsidra jfittex l-għajnuna tal-Istati Uniti biex jindirizza n-nuqqasijiet identifikati fir-rapport u dan meta fadal inqas minn ħames xhur mit-terminu stipulat mill-Moneyval. Wiehed irid jara ukoll jekk l-offerta ta’ ghajnuna mill-Istati Uniti hiex marbuta ma kundizzjonijiet li jhallu impatt fuq is-settur finanzjarju. Certament izda huwa ta’ għajb fuq il-Gvern li ħalla din il-kwistjoni mdendla, b’nuqqas ta’ hsieb jew b’intenzjoni, u b’hekk pogga f’periklu l-impjiegi f’dan is-settur.
Il-Partit Nazzjonalista jappella lill-Gvern biex ikun aktar trasparenti dwar x’verament qed jiġri fil-qasam tal-ġlieda kontra l-ħasi
l ta’ flus. Filwaqt li l-FIAU żvelat ftit tal-ġranet ilu li rċiviet kważi 2,800 rapport ta’ transazzjoni suspettuża fl-2019, u li minkejja li numru ta’ każijiet fejn ikun hemm suspetti raġjonevoli jingħaddu lill-pulizija, ma teżisti l-ebda informazzjoni dwar x’azzjonijiet filfatt ikun ittieħdu f’dawn iċ-ċirkostanzi.
Ir-reputazzjoni ta’ pajjiżna qed tibqa’ tbati wkoll mir-rabta mill-qrib bejn Kastilja u l-MFSA, bl-IMF terġa’ tappella biex din tal-aħħar tkun indipendenti fil-ħidma tagħha.
L-Oppożizzjoni tappella lill-Gvern biex ikun ċar dwar dak li għaddej u mhux jostor in-nuqqasijiet f’dan is-settur. Fid-dawl tal-kriżi attwali, pajjiżna żgur ma jiflaħx li jaqla’ daqqa ekonomika oħra tort tan-nuqqas ta’ rieda jew kompetenza li l-Gvern jaġixxi fuq il-ħasil ta’ flus.
