“Fl-Għid il-Kbir, 4 dgħajjes ippakkjati bi tfal, nisa u rġiel abbord kienu bejn sema w ilma waqt li żewġ pajjiżi mill-aktar Kattoliċi devoti baqgħu jħarsu waqt li waħda mid-dgħajjes nqalbet”.
Hekk ingħad fi stqarrija mibgħita mill-Kunsill Nazzjonali Żgħażagħ fejn saħqu li kawża tal-impatt tal-pandemija tal-Coronavirus ma jfissirx li bħala poplu għandna ninsew il-valuri umanitarji tagħna.
KNŻ sostnew li s-sagrifiċċji li qed jagħmlu l-frontliners f’pajjiżna bħal mediċi u l-membri tas-sigurtà huma xejn inqas minn atti erojiċi iżda bħala nazzjon ma nistgħux nibqgħu nħarsu waqt li persuna innoċenti qed jgħerqu fl-ibħra tagħna.
Minkejja li hemm raġunijiet validi li persuna tista’ targumenta dwarhom bħal; m’għandnix aktar spazju, ninsabu fi kriżi pandemika, eċċ.. minħabba dan kollu ma nistgħux ninsew l-obbligi umanitarji u internazzjonali tagħna. KNŻ saħqu li l-persuni abbord id-dgħajjes li jinsabu f’ħalq il-mewt iridu jitħallew jiddaħħlu fil-portijiet tagħna, jiddiżimbarkaw u jitqiegħdu fi kwarantina.
Huma saħqu li l-prijorità tal-pajjiż għandha tkun li dawn il-persuni ma jmutux. Għaldaqstant KNŻ spjegaw li ffirmaw petizzjoni li qed tappella lill-Prim Ministru Robert Abela sabiex jieħu azzjoni u ma jħallihomx imutu.
KNŻ appellaw ukoll lill-Istati Membri tal-Unjoni Ewropea sabiex jerfgħu r-responsabbilità meħtieġa fejn jidħlu obbligi ta’ burden sharing.
