L-ebda titjira skedata li għandha tinżel Malta. L-Ajruport Internazzjonali ta’ Malta huwa wieħed, tista’ tgħid, bla ruħ wara li l-pandemija ta’ Covid-19 tfaċċat f’pajjiżna.
Bl-aħħar miżuri imposti mill-Gvern fejn il-Ministeru għall-Affarijiet Barranin spjega li l-aħħar titjiriet s’issa ta’ ripatrijazzjoni twettqu proprju f’Ħadd il-Għid minn Frankfurt u Heathrow, Londra – wieħed jimmaġina li l-mitjar huwa wieħed inattiv. Wara ilbierah ġie spjegat li m’hemm l-ebda garanzija li dawn jibqgħu jitwettqu, “min jibqa’ barra responsabbiltà tiegħu”.
Iżda dalgħodu, minkejja l-appelli kollha tal-Awtoritajiet tas-Saħħa, x-xena barra l-ajruport kienet waħda li ħalliet lil kulħadd bla kliem. Ammont ta’ nies miġbura quddiem is-swali tat-tluq u l-wasliet, kulħadd f’qaqoċċa waħda.
Minkejja l-appelli, u l-miżuri imposti xorta waħda l-persuni jidhru miġbura f’daqqa. Fost il-miżuri li ttieħdu l-pubbliku huwa obbligat bil-liġi li barra ma jistgħux ikunu fi gruppi ta’ aktar minn tlieta ġaladarba ma jgħixux taħt l-istess saqaf. Dan kollu inqas minn 24 siegħa wara li l-Pulizija mmultat aktar minn 100 persuna minħabba li kissru din il-liġi.
Dawn in-nies kollha jidher li kienu hemm hekk kif hemm 3 titjiriet skedati biex jitilqu t-tnejn filgħodu fosthom charter flight tal-AirSerbia lejn Belgrad b’140 persuna abbord.
