L-aħbar żvelata minn theshiftnews.com li l-kumpanija BEAT Ltd ġiet mogħtija direct order oħra ta’ €6,000 mill-Enemalta biex tipprova tagħmel cover-up tar-rapport tal-Awditur Ġenerali dwar tbagħbis fl-għoti tal-kuntratt għall-bini ta’ powerstation u x-xiri tal-provvista tal-elettriku, hija konferma ta’ kemm il-Gvern immexxi minn Robert Abela ser ikompli fuq il-passi ta’ Joseph Muscat biex pajjiżna jibqa’ mmexxi mill-iktar Gvern korrott fl-istorja ta’ pajjiżna.
Dan intqal fi stqarrija ffirmata mill-Membri Parlamentari Ryan Callus, Kelliem tal-Oppożizzjoni għall-Enerġija u Konservazzjoni u Immaniġġjar tal-Ilma kif ukoll Karol Aquilina, Kelliem tal-Oppożizzjoni għall-Governanza Tajba, Tisħiħ tad-Demokrazija, għaċ-Ċittadinanza u r-Riforma tas-Servizz Pubbliku.
Huma saħqu li din id-deċiżjoni tal-Enemalta li saret bil-barka tal-Gvern Laburista tmur għal kollox kontra il-prinċipji ta’ kontabbilità u governanza tajba li bħala entità tal-Istat l-Enemalta hija obbligata li tosserva bl-iktar mod rigoruż.
Ġie spjegat li l-kumpanija BEAT Ltd kienet diġà ingħatat €150,000 f’direct orders b’rabta mal-aġġudikazzjoni tat-tender għall-bini tal-powerstation il-ġdida u għalhekk kienet parteċipi b’mod sħiħ fl-iktar proġett korrott fl-istorja ta’ pajjiżna. Dan huwa fatt li jpoġġi lill-kumpanija BEAT Ltd u l-persuni nvoluti fl-istess kumpanija f’kunflitt ta’ interess qawwi li ma jista’ qatt jiġi aċċettat.
Il-Partit Nazzjonalista fakkar li fir-rapport tiegħu l-Awditur Ġenerali kkonkluda li l-kumpanija BEAT Ltd kienet wettqet nuqqasijiet serji fl-aġġudikazzjoni ta’ dan it-tender. Għalhekk din il-kumpanija u l-Gvern li inkarigaha permezz tal-Enemalta, ma jistgħu u m’għandhom qatt ikunu fdati biex jindirizzaw u jsolvu darba għal dejjem il-korruzzjoni kollha li saret u li għaliha qed iħallas l-poplu Malti u Għawdxi.
Il-Partit Nazzjonalista jfakkar li l-azzjonist li huwa s-sid tal-maġġoranza tal-ishma fil-kumpanija Beat Ltd, David Galea, huwa:
1. Persuna viċin ħafna u ħabib sew tal-eks Ministru Konrad Mizzi;
2. Taħt il-Ministru Konrad Mizzi, David Galea kien il-magħżul biex imexxi l-iktar kumitat importanti fl-għażla tal-offerti dwar il-bini tal-powerstation il-ġdida; u
3. Mill-ġdid taħt il-Ministru Konrad Mizzi, David Galea ġie magħżul bħala l-Project Director tal-bini tal-powerstation il-ġdida.
Fir-rapport tiegħu l-Awditur Ġenerali kien sab li David Galea kien inkonsistenti f’xogħlu, b’mod partikolari meta eskluda numru ta’ offerenti għal xi nuqqasijiet, meta offerenti oħra, inkluż l-offerent preferut ElectroGas Malta Ltd, inżammu fil-proċess minkejja li kellhom l-istess nuqqasijiet.
L-Awditur Ġenerali kien sab ukoll li l-konklużjonijiet tal-proċess tal-għażla kienu kkomunikati qabel ma’ ġew approvati mir-Review Board u li l-proċess ta’ due diligence tħalla barra. Fost oħrajn dan il-Kumitat tal-għażla kellu fih il-kumpanija NEXIA BT li hija wkoll il-konsulent finanzjarju ta’ Konrad Mizzi u Keith Schembri u li kienet involuta wkoll fit-twaqqif ta’ kumpanija u ftuħ ta’ kontijiet sigrieti fil-Panama għal Keith Schembri u Konrad Mizzi. NEXIA BT kienet ukoll kienet parti mill-bord biex tintgħażel il-kumpanija Vitals li lilha l-Gvern Malta biegħ tliet spartijiet pubbliċi.
Għalhekk il-Partit Nazzjonalista jistenna li l-Ministru Michael Farrugia li huwa politikament responsabbli mill-Enemalta, jiżgura li dan id-direct order li ngħata lill-kumpanija BEAT Ltd biex tipprova tagħmel “cover-up”, jiġi rtirat u li kemm il-kumpanija BEAT Ltd u David Galea ma jkollhom l-ebda involviment ieħor fil-proġett tal-powerstation il-ġdida u r-rapport tal-Awditur Ġeneral dwaru.
Il-Partit Nazzjonalista jfakkar li wieħed mis-sidien tal-proġett tal-powerstation il-ġdida, Yorgen Fenech, huwa wkoll s-sid tal-kumpanija 17 Black u li llum-il ġurnata jinsab akkużat li huwa wieħed mill-mandanti tal-assassinju tal-ġurnalista Daphne Caruana Galizia.
Il-Partit Nazzjonalista jistenna li l-konklużjonijiet tal-Awditur Ġenerali dwar il-proġett tal-power station il-ġdida jiġu osservati u rispettati mill-Gvern u mhux li l-Gvern ikompli jabbuża minn fondi pubbliċi biex jipprova jgħatti l-ikbar monument tal-korruzzjoni li minnu l-poplu Malti qed jhallas f‘kontijiet tad-dawl u l-ilma ‘l fuq minn 86 miljun Euro minhabba kumpaniji li ghadhom hemm sa illum.
