Lokali

AĠĠORNATA: Isofri minn feriti serji wara li ntlaqat minn karozza fi Triq Reġjonali

Raġel ta’ 32 sena minn San Ġiljan qed isofri minn feriti serji wara li ntlaqat minn vettura fi Triq Reġjonali fl-Imsida.

L-inċident seħħ għall-ħabta tal-4.40pm wara li l-vann li kien qed isuq il-vittma waqaf minħabba xi problemi mekkaniċi.

Iżda meta niżel jiċċekja, hu ntlaqat mill-vettura, tat-tip Volkswagen, misjuqa minn Sirjan ta’ 23 sena minn San Pawl il-Baħar, li ġiet minn wara u ħabtet fil-vann tal-vittma.

Minbarra tim mediku, fil-post issejħu wkoll il-Pulizija, bil-vittma ingħata l-ewwel għajnuna u aktar tard, ittieħed l-Isptar Mater Dei. Hemm, hu kien iċċertifikat li qed isofri minn feriti serji.

Bil-każ ġiet infurmata l-Maġistrat tal-għassa Natasha Galea Sciberras, filwaqt li l-investigazzjonijiet qed jitmexxew mill-Pulizija tad-Distrett.