L-eks attakkant Ingliż Jimmy Greaves ħareġ mill-isptar wara li ddaħħal il-ġimgħa l-oħra minħabba li kien ma jiflaħx. Stqarrija fuq il-paġna uffiċjali ta’ Greaves ikkonfermat li qed ikompli jirkupra d-dar. Greaves li għandu 80 sena, daħal l-isptar madwar ġimgħa ilu. Il-kundizzjoni tiegħu ma jidhirx li kellha x’taqsam mal-coronavirus jew mal-puplesija li kien sofra fl-2015.
Greaves hu kkunsidrat wieħed mill-aqwa attakkanti Ingliżi tal-ġenerazzjoni tiegħu. Mat-tim nazzjonali hu skorja 44 gowl f’57 logħba u kien parti mit-tim li rebaħ it-Tazza tad-Dinja fl-1966. Hu beda l-karriera ma’ Chelsea u lagħab għal staġun ma’ Milan qabel ingħaqad ma’ Tottenham Hotspur fl-1961. Ma’ Spurs dam jilgħab disa’ snin u sar l-aqwa skorer tal-klabb b’total ta’ 266 gowl skorjat. Wara li lagħab ma’ West Ham, Greaves temm il-karriera ma’ timijiet inferjuri.
