16 TA’ APRIL 1960
Il-kowċ Spanjol Rafa Benitez illum qed jiċċelebra s-60 sena. Il-karriera tiegħu bħala kowċ tmur lura għas-sena 1993 iżda ilu fl-ogħla livell tal-futbol Ewropew mill-istaġun 2001/02 meta nħatar kowċ ta’ Valencia u f’dak l-istaġun rebaħ il-kampjonat Spanjol. Mal-istess klabb rebaħ kampjonat ieħor u t-Tazza UEFA fl-istaġun 2003/04
Wara li ħalla lil Valencia, Benitez beda esperjenza ġdida fl-Ingilterra ma’ Liverpool. Fl-istaġun 2004/05 hu mexxa lil Liverpool għar-rebħ tal-UEFA Champions League meta fil-finali kienu rkupraw minn tliet gowls minn taħt kontra Milan f’Istanbul. Hu dam ma’ Liverpool sa tmiem l-istaġun 2009/10 fejn magħhom rebaħ ukoll il-UEFA Super Cup, il-Community Shield u l-FA Cup.
Fis-sajf tal-2010, Benitez inħatar kowċ ta’ Inter. Minkejja li dam biex imexxihom sa Diċembru, Benitez rebaħ is-Supercoppa Italiana u t-Tazza tad-Dinja tal-klabbs. Wara kważi sentejn mingħajr klabb, Benitez irritorna fil-Premier League Ingliż bħala manager temporanju ta’ Chelsea. Proprju fil-ftit xhur li għamel mal-klabb fl-istaġun 2012/13, l-Ispanjol mexxa lit-tim minn Londra għar-rebħ tal-UEFA Europa League.
Fis-sajf tal-2013, Benitez irritorna l-Italja bħala kowċ ta’ Napoli. Fiż-żewġ staġuni li dam man-Naplitani, Benitez rebaħ il-Coppa Italia u s-Supercoppa Italiana. Fis-sajf tal-2015 ingħaqad ma’ Real Madrid b’kuntratt ta’ tliet snin iżda fil-bidu ta’ Jannar tal-2016 tkeċċa mill-kariga.
Xahrejn wara, Benitez inħatar manager ta’ Newcastle bit-tama li jgħin lit-tim jibqa’ fil-kbar. Newcastle xorta kienu relegati iżda Benitez għażel li jibqa’ mal-klabb u fl-istaġun 2016/17 mexxa lit-tim għar-rebħ taċ-Championship biex reġgħu telgħu fil-Premier League. Hu ħalla l-klabb wara li żamm lit-tim fil-Premier League għal żewġ staġuni konsekuttivi. F’Ġunju tas-sena l-oħra nħatar kowċ ta’ Dalian Yifang fis-Super League Ċiniż.
