Raġel ta’ 47 sena mill-Mosta ittieħed l-iSptar Mater Dei isofri minn ġrieħi serji wara li ntlaqat minn folji tal-ħġieġ. Stqarrija tal-Pulizija tgħid li l-inċident seħħ għall-ħabta tal-11a.m. fi Triq il-Ballut fil-Mosta.
Ir-raġel sofra l-ġrieħi wara li waqgħu fuqu folji tal-ħġieġ li kien qed iħott. Fuq il-post issejjaħ tim mediku li ħa lir-raġel l-Isptar Mater Dei fejn iktar tard hu kien iċċertifikat li qed isofri minn ġrieħi serji.
Bil-każ kien infurmat il-Maġistrat tal-Għassa Joe Mifsud li fetaħ inkjesta u ħatar numru ta’ esperti. L-investigazzjonijiet qed jitmexxew mill-Pulizija tad-Distrett.
