Il-kantanta Maltija Destiny llejla se tkun waħda minn tliet finalisti f’edizzjoni tal-Eurovision Song Contest fuq stazzjon televiżiv segwit sew fl-Awstrija.
Dan wara li dan l-istazzjon ħa l-inizjattiva li, fin-nuqqas tal-edizzjoni ta’ din is-sena tal-Eurovision Song Contest, li kellu jitħassar minħabba l-pandemija tal-Covid-19, jorganizza l-Eurovision fuq it-televiżjoni, bis-sehem tal-kanzunetti kollha (u l-videos tagħhom) li kienu se jipparteċipaw f’din l-edizzjoni f’Rotterdam. L-ispettaklu televiżiv jismu Der Kleine Song Contest:
Il-festival televiżiv kien imqassam fuq tlett ijiem bi tliet gruppi ta’ pajjiżi li minnhom kull darba jintgħażel rebbieħ li jkun finalist fl-edizzjoni finali tal-lejla. L-ewwel grupp ta’ kanzunetti kkompetew nhar it-Tlieta, u minn dawn rebħet il-kanzunetta tal-Iżlanda ‘Think about Things’ b’75 punt.
It-tieni edizzjoni saret il-Ħamis li għadda u r-rebbieħa fost 14-il pajjiż kienet proprju Malta permezz ta’ Destiny bil-kanzunetta ‘All of My Love’, li kisbet total ta’ 97 punt, segwita mill-Iżvizzera b’86 punt u Franza b’69 punt.
B’hekk Destiny rebħet id-dritt li tkun it-tieni finalista tal-kompetizzjoni. It-tielet finalista tkun magħrufa llejla meta jkunu preżentati l-kanzunetti tal-aħħar grupp ta’ 13-il pajjiż Ewropew, li jinkludu fosthom lill-Awstralja.
Imbagħad, illejla stess, il-pubbliku jkun mitlub jagħżel, permezz tat-telefonati tiegħu, lir-rebbieħa finali fost it-tliet pajjiżi finalisti.
Ta’ min jgħid li l-għażliet ta’ dawn il-finalisti qed isiru minn ġurija esperta komposta minn grupp ta’ 10 kantanti li rrappreżentaw lill-Awstrija f’edizzjonijiet passati tal-Eurovision Song Contest, fosthom il-kantanta Conchita, li fl-2014 rebħet dan il-festival mużikali prestiġjuż bil-kanzunetta ‘Rise Like a Phoenix’. Huma taw il-punti tagħhom, mill-1 sa 12, lill-kanzunetti parteċipanti.
Madankollu se jkun il-pubbliku Awstrijak li llejla jagħżel il-kanzunetta rebbieħa fost l-aħħar tliet finalisti. Awguri Destiny!
Ir-riżultati tad-Der Kleine Song Contest
L-EWWEL GRUPP:
- Iżlanda (75 punt)
- Olanda (71 punt)
- Bulgarija (71 punt)
- Ingilterra (66 punt)
- Belġju (63 punt)
- Polonja (61 punt)
- Rumanija (61 punt)
- Iżrael (60 punt)
- Spanja (55 punt)
- Ċipru (50 punt)
- Ġorġja (49 punt)
- Armenja (42 punt)
- San Marino (35 punt)
- Belarussja (17-il punt)
IT-TIENI GRUPP:
- Malta (97 punt)
- Żvezja (86 punt)
- Franza (69 punt)
- Russja (67 punt)
- Żvizzera (64 punt)
- Litwanja (57 punt)
- Finlandja (56 punt)
- Irlanda (55 punt)
- Ażerbajġan (50 punt)
- Slovenja (50 punt)
- Kroazja (45 punt)
- Latvja (36 punt)
- Portugall (30 punt)
- Moldova (28 punt)
IT-TIELET GRUPP: (Ir-riżultat jitħabbar illejla)
Albanija
Awstralja
Awstrija
Repubblika Ċeka
Danimarka
Estonja
Ġermanja
Greċja
Italja
Maċedonja
Norveġja
Serbja
Ukrajna
