Numru ta’ pajjiżi fl-Ewropa bdew inaqqsu l-miżuri tal-lockdown iżda ammont sostanzjali ta’ uffiċjali tas-saħħa baqgħu jinsistu li l-pandemija għadha ‘il bogħod mit-tmiem tagħha.
Dan meta kienu konfermati ‘il fuq minn 2.4 miljun infezzjoni madwar id-dinja, b’aktar minn 165,000 mewta mill-effetti tal-coronavirus fuq livell globali.
Spanja kienet fost l-ewwel pajjiżi li llum aġġornaw iċ-ċifri , bl-infezzjonijiet f’artha jiżdiedu għal aktar minn 200,000 – b’400 mewta oħra jkunu rappurtati f’perjodu ta’ 24 siegħa għal total nazzjonali ta’ 20,852. Spanja għandha t-tieni l-ogħla numru ta’ infezzjonijiet bil-coronavirus fid-dinja wara l-Istati Uniti. Dan meta Spanja mgħandha l-ebda pjani biex ittemm is-sitwazzjoni ta’ lockdown.
Madankollu, qegħdin jonqsu r-restrizzjonijiet madwar l-Ewropa, bil-Ġermanja tiftaħ mill-ġdid numru ta’ stabbilimenti kummerċjali u bit-tfal jirritornaw fil-kumplessi tal-kindergarten fin-Norveġja. Il-Polonja qed tippermetti li n-nies jerġgħu jżuru l-parks u l-foresti waqt li fid-Danimarka, id-dentisti, hairdressers u tattoo-parlours mill-ġdid qegħdin joffru s-servizzi lill-klijenti rispettivi.
Ir-Repubblika Ċeka qed tippermetti li xi swieq u negozji żgħar jiftħu għal darba’ oħra, bl-awtoritajiet lokali jieħdu l-ewwel passi fi pjan – imqassam fuq ħames fażi – għal ritorn lejn ħajja anqas restrittiva. Is-swieq tal-bdiewa, l-ażjendi li jbiegħu l-karozzi u intrapriżi oħra qed jiftħu mill-ġdid f’dan il-pajjiż – li kien fost l-ewwel li introduċa l-lockdown fl-Ewropa – għall-ewwel darba mit-12 ta’ Marzu.
Il-Prim Ministru ta’ Franza Edouard Philippe insista li l-kriżi ‘għadha preżenti’ f’pajjiżu fejn iċ-ċifra tal-mewt avviċinat l-20,000. Mistenni li fi Franza dalwaqt issir mandatorja li n-nies jilbsu l-maskli tal-wiċċ huma u jużaw it-trasport pubbliku – bil-Gvern qed jaħseb biex jissupplixxi l-maskli lill-Franċiżi kollha li għandhom bżonnhom.
Il-Prim Ministru tar-Renju Unit, Boris Johnson, sadanittant, hu kawt ħafna dwar il-possibbiltà li jitneħħa l-lockdown f’pajjiżu.
Il-messaġġ ewlieni li ħareġ minn laqgħa bejnu u s-Segretarju Britanniku għall-Affarijiet Barranin, Dominic Raab ( li qed imexxi l-pajjiż proviżorjament waqt li Johnson jirkupra mill-effetti tal-Covid-19) jindika li l-lockdown għandu jibqa’ għaż-żmien kollu neċessarju biex il-pajjiż jevita tieni mewġa potenzjali tal-coronavirus.
Ftit tal-ħin ilu daħlu rapporti li mietu 449 oħra bil-coronavirus fl-isptarijiet tar-Renju Unit fuq perjodu ta’ 24 siegħa. Dan ifisser li l-imwiet fl-isptar mill-Covid-19 issa laħħqu s-16,509. Iċ-ċifri tal-imwiet ta’ kuljum minn dan il-pajjiż ma jinkludux vittmi qalb il-komunità — inklużi n-nies li qed imutu fid-djar tal-anzjani u għal persuni bi bżonnijiet speċjali.
