Il-Kunsill Nazzjonali taż-Żgħażagħ (KNŻ) ħabbar lil Eman Borg bħala l-ewwel Ambaxxatur taż-Żgħażagħ tal-Commonwealth Malti.
L-għan primarju ta’ dan l-Ambaxxatur huwa li jaġixxi bħala l-pont bejn is-Segretarjat tal-Commonwealth, il-Kunsill taż-Żgħażagħ tal-Commonwealth u ż-żgħażagħ Maltin filwaqt li jsaħħaħ is-sens ta’ appartenenza taż-żgħażagħ għal din l-istituzzjoni.
Rwol bħal dan jgħin biex jistabbilixxi lill-KNŻ u lil Malta bħala protagonisti attivi f’din il-komunità globali, fejn il-valuri tagħha ta’ żvilupp, demokrazija u paċi huma meħtieġa aktar minn qatt qabel biex tissalvagwardja l-kooperazzjoni pożittiva fuq skala internazzjonali. Fil-klima politika attwali, iż-żgħażagħ Maltin u Għawdxin se jkollhom parti integrali biex isibu soluzzjonijiet innovattivi biex jittrasformaw u jgħaqqdu l-Commonwealth tagħna.
Iż-żgħażagħ Maltin se jibbenefikaw minn aktar esponiment għal opportunitajiet u kollaborazzjonijiet futuri fuq firxa wiesgħa ta’ suġġetti; L-indirizzar tal-kwistjonijiet dwar il-qgħad, il-faqar, edukazzjoni ta’ kwalità, akkomodazzjoni, ambjent sostenibbli u tibdil fil-klima se jittieħed bħala l-prijoritajiet tal-Ambaxxatur taż-Żgħażagħ tal-Commonwealth. Ir-riżultat imbagħad jitressaq lit-Task Force Internazzjonali bħala parti mill-Forum taż-Żgħażagħ tal-Commonwealth li jirrappreżenta liż-żgħażagħ tal-Commonwealth għall-Kapijiet tal-Istat matul iċ-CHOGM 2020.
Eman Borg għandu firxa wiesgħa ta’ esperjenza jaħdem fl-isfera tal-Commonwealth wara li rrappreżenta liż-żgħażagħ Maltin fil-Forum taż-Żgħażagħ tal-Commonwealth 2019 u li rebaħ ukoll il-premju Queen Young Leader fl-2017 dwar l-attiviżmu tiegħu ma’ LGBTI + Għawdex. Bħalissa huwa konsulent taż-żgħażagħ għall-Queen Commonwealth Trust. Il-KNŻ awguraw lil Borg għal dan l-irwol.
Il-Kap tal-Oppożizzjoni u Kap tal-Partit Nazzjonalista Adrian Delia awgura lil Eman Borg għall-irwol il-ġdid tiegħu.
