Il-kampjonati Ligue 1 u Ligue 2 mhux se jkomplu wara li l-Prim Ministru Franċiż ħabbar li l-ebda avvenimenti sportivi, lanqas bil-bibien magħluqa, mhux se jkomplu qabel Settembru. Din l-aħbar issegwi d-deċiżjoni li ttieħdet fl-Olanda hekk kif lanqas il-kampjonat Eredivisie mhux se jkompli. Il-kampjonat Franċiż hu l-ewwel wieħed mill-aqwa ħamsa fl-Ewropa li uffiċjalment ma jistax jitkompla.
Fil-klassifika preżenti ta’ Ligue 1, PSG jinsabu bi 68 punt minn 27 logħba, b’vantaġġ ta’ 12-il punt fuq Olympique Marseille iżda b’logħba anqas. Din id-deċiżjoni tfisser li teżisti possibbiltà li PSG ikunu mċaħħda mir-rebħ tal-kampjonat. Dan hekk kif l-attenzjoni issa ddur fuq id-deċiżjoni li se tittieħed dwar il-klassifikazzjoni finali u min se jilgħab fil-kompetizzjonijiet Ewropej.
