L-eks plejer ta’ Liverpool Michael Robinson miet fl-età ta’ 61 sena. Hu jibqa’ mfakkar l-aktar għal dak li kiseb ma’ Liverpool fl-istaġun 1983/84 meta kien parti mit-tim li rebaħ il-kampjonat, il-League Cup u t-Tazza taċ-Champions.
Wara esperjenzi ma’ Preston North End, Manchester City u Brighton, Robinson ingħaqad ma’ Liverpool f’Awwissu tal-1983 bħala riserva ta’ Ian Rush. Fil-karriera tiegħu, l-eks attakkant lagħab ukoll ma’ Queens Park Rangers u spiċċa l-karriera ma’ Osasuna fi Spanja.
Wara li rtira, Robinson baqa’ Spanja fejn anki baqa’ fix-xena tal-futbol bħala kummentaturi, opinjonist u preżentatur. Robinson lagħab 24 darba mat-tim nazzjonali tal-Irlanda u skorja erba’ gowls. Malli ħarġet l-aħbar tal-mewt tiegħu, kienu bosta persuni midħla ta’ Liverpool u l-futbol Spanjol li sellmu l-memorja tiegħu.
