L-Eżekuttiv tal-Unjoni Ewropea fetaħ każ legali ġdid kontra l-Gvern tal-Polonja b’konnessjoni mal-allegat ‘indħil’ fir-responsabbiltajiet tal-membri tal-ġudikatura f’dan il-pajjiż.
Il-Polonja — l-akbar eks Stat komunista msieħeb fl-Unjoni — ilha f’diżgwid mal-Unjoni li akkuża lill-Partit PiS ( għal-Liġi u Ġustizzja) fil-Gvern b’li qed itellef id-demokrazija bil-kontroll eżaġerat fuq il-qrati, il-media u s-soċjetà ċivili fil-pajjiż. Intant, il-PiS qed jiċħad għal dawn l-akkużi.
Illum, il-Kummissjoni Ewropea qalet li qed tagħti sa xahrejn żmien lill-Polonja biex tindirizza t-tħassib dwar liġi kontroversjali li l-Gvern ta’ Varsavja kien introduċa aktar kmieni fis-sena. Il-liġi tippermetti l-impożizzjoni ta’ pieni għall-imħallfin li jikkritikaw ir-riformi tal-Gvern għas-sistema ġudizzjarja ta’ pajjiżhom.
Vera Jourova, membru tal-Kummissjoni eżekuttiva li hi responsabbli mill-ħarsien tal-valuri demokratiċi tal-UE, wissiet dwar is-sogru ċar li l-kriterji ‘biex jiddixxiplinaw’ lill-maġistrati Pollakki kapaċi jintużaw ‘għall-kontroll politiku tal-kontenut tad-deċiżjonijiet ġudizzjarji’.
Jourova tinsisti li l-issue tikkonċerna lill-Ewropa għaliex il-qrati Pollakki japplikaw il-liġi Ewropea u meta l-imħallfin ta’ pajjiżi oħra jrid ikollhom fiduċja li l-kollegi fil-Polonja qegħdin jaġixxu b’mod indipendenti mill-Gvern.
F’sitwazzjoni fejn il-Polonja tibqa’ twebbes rasha, il-Kummissjoni Ewropea għandha tiftaħ rikors kontra dan il-pajjiż fil-Qorti tal-Ġustizzja tal-Ewropa.
Il-każ jinkwadra fost id-diversi battibekki bejn l-UE u l-Polonja rigward ir-rispett għad-dritt tal-liġi.
