Wara li iktar kmieni din il-ġimgħa, il-Prim Ministru Franċiż Edouard Philippe ħabbar li l-isport fi Franza mhux se jkun jista’ jitkompla u b’hekk ittieħdet id-deċiżjoni li l-kampjonat jiġi kkanċellat, issa jidher li PSG ġew nkurunati champions. Meta kien baqa’ għaxar logħbiet għal tmiem l-istaġun PSG kienu fil-quċċata tal-klassifika b’12 –il punt vantaġġ fuq Marseille li kienu jinsabu fit-tieni post. Il-pożizzjonijiet fil-klassifika preżenti se jitqiesu bħala dawk finali.
Għal PSGdan hu d-disa’ kampjonat fl-istorja tagħhom, b’sebgħa minnhom jaslu fl-aħħar tmien staġuni. Aktar kmieni, il-kampjonat Olandiż ukoll ġie kkanċellat fejn hemmhekk ġie deċiż li ma jkunx hemm rebbieħ minħabba li Ajax u AZ Alkmaar kienu fl-ewwel post tal-klassifika bl-istess ammont ta’ punti.
