Il-klabbs tal-Premier League huma determinati li jtemmu l-kampjonat Ingliż minkejja lli wħud isostnu li dan hu kmieni wisq.
Waqt laqgħa li għandha ssir għada bejn dawk kollha nvoluti se tiġi proposta d-data tat-8 ta’ Ġunju biex jitkompla l-kampjonat. Waqt l-istess laqgħa se jiġi propost biex il-plejers tal-Premier League jkunu ttestjati għall-coronavirus darbtejn fil-ġimgħa. Fil-ġranet li ġejjin, l-Gvern Ingliż mistenni japprova pjan biex it-timijiet kollha tal-Premier League jkunu jistgħu jirritornaw għat-taħriġ. Din il-proposta ġiet mfassla minn Dr. Mark Gillett, konsulent mediku tal-Premier League wara li saret konsultazzjoni ma kampjonati oħra fl-Ewropa.
Dawn it-testijiet se jsiru biss jekk ma jikkawżawx piż żejjed fuq is-sistema tas-saħħa Ingliża. Min naħa tagħha l-Premier League qalet li se tkun qed tħallas hi għal dawn it-testijiet. Din il-proposta se titressaq quddiem daw kollha nvoluti f’laqgħa li għandha ssir għada u jekk ikun approvat mill-Gvern, il-kampjonat ikun jista’ jitkompla f’Ġunju b’bibien magħluqa.
