Din il-ġimgħa, il-Kamra tal-Kummerċ wettqet stħarriġ ieħor fost il-membri tagħha biex tikkalkula l-opinjonijiet tan-negozju fid-dawl tal-istress ekonomiku kontinwu, l-istaġnar u l-portata attwali tal-appoġġ għan-negozju. Ir-regolarità ta’ stħarriġ bħal dan hija mmirata biex tiżgura li l-Kamra tkun kontinwament aġġornata bis-sitwazzjoni reali f’kull ħin matul id-diskussjonijiet tagħha mal-awtoritajiet f’isem in-negozju.
Ir-riżultati tal-aħħar stħarriġ ikkonfermaw ix-xejriet li ħarġu minn dawk li saru fil-ġimgħat li għaddew. Mill-mudell tar-riżultati joħroġ ċar li n-negozji għandhom bżonn appoġġ usa’ u gwida aktar realistika mill-awtoritajiet sabiex jevitaw iktar sensji.
Il-Kamra, fil-fatt, ilha għal żmien twil tisħaq għal bidla fl-approċċ biex tipprovdi appoġġ fil-pagi lin-negozji bbażat fuq kriterji marbuta mat-telf fid-dħul minflok wieħed ibbażat fuq il-kodiċi NACE. Dawk in-negozji li jinsabu barra l-kodiċi NACE stabbiliti fl-Annessi A u B qegħdin isofru diffikultajiet kbar fil-waqt li l-awtoritajiet huma mxekkla minn nuqqas ta’ kriterji oġġettivi dwar l-approvazzjoni ta’ l-appoġġ.
Il-provvista ta’ appoġġ finanzjarju dirett tista’ tittaffa permezz ta’ tneħħija gradwali tal-miżuri taħt superviżjoni stretta. Għal dan il-għan, il-Kamra tal-Kummerċ ipproponiet strateġija ta’ ħruġ konkreta lill-Gvern dwar kif tista’ tittaffa l-kriżi ekonomika, sabiex jippermetti ftuħ gradwali tal-ekonomija. Fi stqarrija l-Kamra qalet li din il-miżura tissalvagwardja l-impjiegi.
Proposti oħra li saru f’dawn l-aħħar ġimgħat mill-Kamra huma relatati ma’ kirjiet li jkomplu joħorġu bħala tħassib serju għal negozji li qed jesperjenzaw sitwazzjonijiet ta’ dħul żero jew negattivi. Tħassib bħal dan ikompli jiġi enfasizzat sew mill-membri permezz tal-istħarriġ u l-Kamra ttenni t-talba tagħha għal ċarezza dwar il-kwistjoni min-naħa tal-awtoritajiet.
