L-Imħallef, R. Gary Klausner ċaħad it-talba tat-tim nazzjonali tan-nisa Amerikan tal-futbol li huma kienu qegħdin jiġu mħallsa inqas mill-irġiel. Klausner iżda laqa’ t-talba tal-istess tim biex jiġi investigat it-trattament inugwali fis-saħħa, fl-ivjaġġar u fit-taħriġ.
Il-plejers qed jitolbu d-differenza ta’ €59 miljun f’danni taħt l-‘Equal Pay Act’. Il-qorti qalet li t-tim tan-nisa ġie mħallas aktar minn dak tal-irġiel fuq bażi kumulattiva u dik għal kull partita. Molly Levinson, kelliema għall-plejers femminili qalet li huma lesti li jappellaw mid-deċiżjoni filwaqt li ddiskriviet l-istess deċiżjoni bħala xokkanti u diżappuntanti. Hi żiedet tgħid li tinsab kunfidenti u determinata li tassigura li t-tfajliet u n-nisa fl-isport jkunu trattati b’mod ugwali rrilevanti mis-sess.
Waħda mill-captains tat-tim, Megan Rapinoe qalet fuq il-mezzi soċjali tagħha b’reazzjoni għad-deċiżjoni tal-qorti li huma qatt m’huma se jieqfu jiġġieldu l-inugwaljanza. L-Assoċjazzjoni Amerikana tal-futbol qalet fi stqarrija li huma jridu jagħmlu minn kollox biex il-futbol ikompli jikber fl-Amerika.
