Illum, mill-4.50 pm fuq NetTV l-25 programm mis-sensiela Sport Extra. Bi produzzjoni ta’ Charles Camenzuli il-programm huwa wieħed speċjali li kien inġibed f’Napli dedikat għall-edizzjoni tal-2019 tal-Universiade li saru f’Lulju tal-istess sena. Fil-programm apparti tagħrif dwar dak li Napli organizzat, intervisti esklussivi ma’ wħud mill-aqwa rebbieħa Olimpici tal-Italja f’dawn l-aħħar snin. Fosthom l-aħwa Pino u Franco Porzio, rebbieħa fil-waterpolo tal-medalja tad-deheb għall-Italja fl-Olimpijadi tal-1992 f’Barcelona kif ukoll il-boxer Patrizio Oliva, medalja ta-deheb fl-Olimijadi tal-1980 f’Moska.
Intervistati wkoll wieħed mill-aqwa għawwiema ta’ kull żmien protagonista f’Sydney fl-2000, Massimiliano Rosolino kif wkoll Davide Tizzano li rebaħ żewg medalji Olimpici fil-qdif. Fil-programm intervista ma’ wieħed mill-ambaxxaturi tal-Universiade, Gianni Maddaloni, missier Pino Maddaloni li rebaħ medalja Olimpika f’Sydney illi iżda ddedika ħajjtu biex permezz tal-judo jiġbor tfal u jgħallimhom l-isport flok li jitħallew fit-toroq ta’ Scampia.
Intervista interessanti mal-kompositur Stefano Gargiulo li kkompona l-innu uffiċjali tal-Universiade bl-isem ‘The Glory’. Muntaġġ tas-servizzi fil-programm sar minn Samira Cachia Spiteri filwaqt li filmati minn Giuseppe Naldini flimkien ma’ Sergio Iannuzzella bil-kollaborazzjoni ta’ Gianfranco Coppola .
