F’laqgħa li saret b’mod virtwali bejn il-President tal-MFA Bjorn Vassallo u l-uffiċjali tal-klabbs li jiffurmaw parti mill-Premier League Standing Committee tħabbar li d-deċiżjoni dwar jekk huwiex se jitkompla l-kampjonat jew le se tittieħed ħdax –il ġunrata oħra, fit-18 ta’ Mejju. Din id-data ġiet magħżula, minħabba li sa dakinhar l-awtoritajiet tas-saħħa u l-Gvern Malti jkollhom stampa aktar ċara fuq is-saħħa u r-riskji dwar jekk kellu jitkompla l-Kampjonat Premier.
Il-President tal-MFA bagħat ittra lill-awtoritajiet lokali flimkien ma’ protokoll mediku dwar dak li hemm bżonn biex tiġi ssalvagwardjata s-saħħa ta’ dawk kollha li se jkunu nvoluti. Fl-ittra nkiteb ukoll li l-MFA hija marbuta mill-UEFA biex sal-25 ta’ Mejju tkun ħadet deċiżjoni dwar x’ser jiġri mill-Kampjonat Premier. Vassallo qal lil dawk preżenti għall-laqgħa li l-MFA hija preparata għal kull eventwalità filwaqt li enfasizza li tkun xi tkun d-deċiżjoni, l-MFA se tkun qed tosserva r-regolamenti tagħha u dawk imposti fuqha mill-UEFA u l-FIFA biex tiġi s-saħħa ta’ dawk involuti tkun salvagwardjata.
