Brian May, il-kitarrist tal-grupp Queen, iddaħħal l-isptar wara li ċarrat muskolu u meta tant spiċċa f’agunija li jinsab fi stat fejn ma jiflaħx jimxi waħdu.
May, li għandu 72 sena, sofra l-isfreġju waqt li kien qed jaħdem fil-ġnien u wara, bagħat messaġġ fuq il-media soċjali fejn qal li ‘ġralu hekk b’kaġun tal-entużjażmu eżaġerat’. L-indikazzjonijiet, għalissa, huma li l-kitarrist leġġendarju għandu jdum ftit biex ikun jista’ jimxi bħas-soltu.
Ir-Rocker veteran, fl-aħħar jiem, kien qed jiddeverti lin-nies minn sitwazzjoni ta’ lockdown permezz ta’ sensiela ta’ ‘micro-concerts’ u tutorials mużikali. Hu anki organizza s-sessjonijiet online fejn id-dilettanti ta’ Queen huma mistiedna biex jipprovdu l-versjonijiet tagħhom tal-kanzunetti miktuba minn Brian May.
