Hekk kif il-ġurnata meta l-MFA se tkun qed tieħu deċizjoni finali dwar it-tkomplija jew le tal-Kampjonat Premier, dejjem qed toqrob, id-diskussjoni fost id-dillettanti tal-futbol Malti dwar dak li skont huma għandu jkun deċiż fiċ-ċirkostanzi li ninsabu fihom, tkompli. Grazzi għall-inizjattiva li ħadet l-aġenzija Replay, li tipproduċi programmi u aħbarijiet dwar il-futbol lokali, li tniedi programm awdjo-viżiv ġdid għal fuq Facebook, bl-isem ta’ #stayhomereplay, il-partitarji tal-futbol lokali qed ikollhom opportunitá li jsegwu diskussjoni u aġġornamenti dwar dak li qed iseħħ fil-kamp kalċistiku Malti.
Illejla s-Sibt, Replay se jkun qed iżomm l-appuntament tiegħu mat-tielet programm tal-ġimgħa mis-sensiela #stayhomereplay, bi preżentazzjoni ta’ Christian Micallef. Il-mistiedna b’mod virtwali ta’ Micallef illejla, se jkunu l-President ta’ Gudja United, l-Avukat Duncan Borg Myatt u l-opinjonista ta’ Replay, Konrad Sultana.
#stayhomereplay jibda fid-9.00pm, esklussivament fuq il-paġna ta’ Replay fuq Facebook. Dawk li ma jirnexxilhomx isegwu l-edizzjoni Premiere tal-lejla, xorta waħda jistgħu ssegwu l-programm fuq Facebook, billi jidħlu fil-paġna ta’ Replay, u jfittxu l-programm tal-lejla fis-sezzjoni tal-filmati. Hemm wieħed jista’ jsib u jara l-programmi kollha ta’ #stayhomereplay li bdew jixxandru l-ewwel minn nhar it-Tnejn, 13 t’April.
Dan il-proġett ġdid minn Replay, illum kiseb popolaritá kbira u skont l-aħħar statistika li jipprovdi Facebook, dan il-programm għandu udjenza medja ta’ aktar minn 4,000 views. Dan l-ammont, meta mqabbel u jkun ikkunsidrat li hu programm dwar il-futbol lokali fuq il-media soċjali, hu meqjus bħala tajjeb ħafna u jikkonferma li l-programmi Replay, partikolarment dawk li jixxandru fuq Net Television, huma l-aktar popolari f’pajjiżna, minn fost il-programmi sportivi kollha li jixxandru f’pajjiżna fuq l-istazzjonijiet kollha.
Intant, minn nhar it-Tnejn li ġej, Replay se jkun qed ibiddel l-iskeda ta’ xandir ta’ #stayhomereplay fuq Facebook. Fuq il-paġna tiegħu fuq Facebook, il-producer eżekuttiv u preżentatur ta’ dawn il-programmi, Micallef stqarr li minħabba esiġenzi personali tal-mument, kif ukoll l-impenn li fih dan il-programm li jixxandar tliet darbiet fil-ġimgħa, #stayhomereplay se jibda jixxandar kull nhar ta’ Erbgħa fid-9.00pm fuq Facebook, u allura darba fil-ġimgħa.
Intant #stayhomereplay tal-lejla s-Sibt, tistgħu ssegwuh ukoll f’xandira Premiere fuq Facebook, fid-9.00pm permezz ta’ dan il-link t’hawn taħt:
