Il-ħwienet tal-ħwejjeġ huma fost dawk il-ħwienet li minn din il-ġimgħa setgħu jiftħu mill-ġdid. Iżda il-bibien miftuħin ma ssarfux f’ritorn tal-kummerċ, hekk kif il-klijenti ma rritornawx fil-ħwienet.
F’intervista waqt il-programm Net Live, Ċettina Said, sid ta’ ħwienet tal-ħwejjeġ, qalet li r-raġunijiet jistgħu ikunu diversi, fosthom li n-nies għadhom qed jibżgħu joħorġu. Jista’ jkun ukoll li ħafna nies jiddejqu jixtru ħwejjeġ mingħajr ma’ jippruvawhom.
Iżda Said taħseb li r-raġuni ewlenija li n-nies mhux qed jikkonkorru, hi li m’hemmx okkażjonijiet, u għaldaqstant m’hemmx id-domanda għal ċertu ħwejjeġ li jintlibsu f’dawn l-okkażjonijiet.
“Min qed jiġi jixtri l-ħwejjeġ, qed jixtri biss ħwejjeġ casual u allura hemm ħafna intoppi. Okkażjonijiet u festi m’hawnx. Iġifieri n-nies m’għandhomx għalfejn jixtru l-ħwejjeġ. Ir-restaurants u l-hairdressers magħluqin allura n-nies mhux se jixtru l-ħwejjeġ biex joħorġu. Għalhekk, nistaqsi x’jixtruhom jagħmlu kważi kważi l-ħwejjeġ in-nies?”
Said qalet li din is-sitwazzjoni se ġġib sfidi kbar għax normalment ix-xahar ta’ Mejju hu wieħed importanti għax-xiri ta’ ħwejjeġ minħabba okkażjonijiet bħal tiġijiet u preċetti, kif ukoll il-Festi. Iżda dan ix-xahar jidher li hu mitluf.
“Mejju kien ikun l-aqwa xahar. Xahar tajjeb ħafna. Issa iktar ma jgħaddi ż-żmien, Ġunju, Lulju, Awwissu u anki Settembru, fin-normalità, kienu jkunu xhur batuti ħafna bħala xogħol. Aħseb u ara issa, li m’aħniex fin-normalità, kif se jkunu dawn ix-xhur li ġejjin!”
Hi stqarret li s’issa żammet lill-ħaddiema kollha, iżda jekk ix-xogħol jibqa’ batut, ma jkunx hemm triq oħra ħlief li jitnaqqsu l-ħaddiema.
Mistoqsija x’jista’ jsir biex forsi in-negozji jingħataw iktar nifs, Ċettina Said qalet li f’sitwazzjoni fejn ftit li xejn hemm dħul, kull miżura li ttaffi l-ispejjeż f’dawn iż-żminijiet tgħin.
Fosthom, tnaqqis fil-kontijiet tad-dawl u l-ilma u posponiment tal-ħlas ta’ kull tliet xhur tal-VAT. Għax filwaqt li n-negozji jkunu xtraw l-istock, m’hemmx garanzija li dan se jinbiegħ. Li jfisser li jkollhom iħallsu t-taxxa jew dazju fuq oġġett li jkun għadu ma nbiegħx.
