Waqt laqgħa mal-Ministru għall-Ekonomija Silvio Schembri, Il-Kamra tal-Kummerċ għamlet sensiela ta’ proposti ġodda lill-Gvern biex jgħin lin-negozji fil-kriżi li ġabet magħha il-COVID-19.
Il-Kamra tal-Kummerċ hija konxja tad-diffikultajiet li numru ta’ negozji qed jiffaċċjaw f’dan iż-żmien, kienet f’kuntatt kontinwu ma’ dawk li huma f’dan il-qasam u għalhekk tinsab fl-aħjar pożizzjoni biex tirrappreżenta t-tħassib tagħhom.
Il-Kamra saħqet li dan huwa żmien ta’ bidliet kbar u rridu naħtfu l-opportunitajiet li qed jiġu ppreżentati, hekk kif ix-xenarju ta’ madwarna qiegħed kuljum jinbidel.
Filwaqt li tenna t-talba tiegħu biex tiġi estiża l-għajnuna għan-negozji kollha li qed jesperjenzaw telf qawwi f’dan iż-żmien, il-President tal-Kamra tal-Kummerċ David Xuereb sostniet li fondi pubbliċi għandhom jintużaw b’mod effiċjenti biex jinċentivaw il-kumpaniji biex jaħtfu l-opportunità li se toħloq dinja ġdida wara l-COVID-19. Dan ikun jinvolvi mudelli u strateġiji ġodda li issa huwa iktar essenzjali minn qatt qabel. Il-kumpaniji għandhom jiġu inċentivati biex jaħdmu iebes biex isiru aktar innovattivi u reżiljenti sabiex jikbru u jiżviluppaw aktar f’suq internazzjonali kompetittiv b’dinamika li tinbidel malajr, sostna David Xuereb.
Għalhekk il-Kamra tal-Kummerċ pproponiet ukoll skema ta’ konsulenza ġdida għall-appoġġ dwar l-iżvilupp ta’ pjanijiet ta’ negozju professjonali biex jerġgħu jinġiebu għanijiet, struttura u operazzjonijiet. L-iskema l-ġdida għandha tinkludi l-possibbiltà li l-kumpaniji kollha jkollhom aċċess għal parir espert dwar l-inġinerija mill-ġdid tan-negozju.
Il-proposti tal-Kamra qed jinkludu wkoll miżuri ta’ appoġġ għal żmien qasir biex jinċentivaw il-kumpaniji biex jinnovaw l-operat tagħhom, għajnuna għal taħriġ jew tibdil mill-ġdid ta’ ħaddiema u sussidji fuq investiment fit-teknoloġija u tagħmir.
Il-Kamra kompliet ittenni t-talba tagħha għal emendi urġenti għall-Att dwar il-Kumpaniji biex tipprovdi protezzjoni temporanja lid-diretturi tal-kumpanija fir-rigward tal-obbligi u r-responsabbiltajiet tagħhom relatati mal-insolvenza. Din il-protezzjoni hija ġġustifikata f’dan ix-xenarju preżenti kkaratterizzat minn inċertezza gravi li tagħmilha diffiċli ħafna li tieħu ċertu deċiżjonijiet.
