13 TA’ MEJJU 1900
Id-data tat-13 ta’ Mejju tal-1900 hi waħda mill-aktar dati importanti fl-istorja tal-futbol Malti. Dakinhar Floriana u St. George’s lagħbu kontra xulxin il-Marsa wara l-ewwel konfront bejniethom fl-1894, logħba li St. George’s kienu rebħu 1-0. Skont il-kittieb u storiku Carmel Baldacchino, rappreżentanti taż-żewġ timijiet kienu ltaqgħu f’Captain’s Bar fil-Belt Valletta biex jagħlqu l-ftehim bejniethom. Huma għamlu mħatra għal ħames lira sterlina u 10 xelini, li dak iż-żmien kienu salarju ta’ sena.
Il-logħba ntlagħbet quddiem eluf ta’ spettaturi li kienu viċin ħafna tal-pitch, tant li l-plejers ftit kellhom spazju biex jagħtu throw-in jew korner. Ir-referee bħal ħafna drabi dak iż-żmien, kien baħri Ingliż. St. George’s lagħbu bi flokk abjad, b’għonq blu u shorts iswed. Floriana fuq in-naħa l-oħra lagħbu flokk aħdar bl-aħmar u shorts iswed. St. George’s marru fil-vantaġġ l-ewwel u wara li tilfu ċans tajjeb, Floriana rnexxielhom iġibu d-draw.
Ftit minuti mill-ftuħ tat-tieni taqsima, St. George’s reġgħu marru fil-vantaġġ, b’Floriana jipprotestaw għal offside, iżda l-gowl kien ikkonvalidat. Busuttil għamel l-iskor 3-1, gowl li qajjem protesti kbar minn Floriana. Il-partitarji Furjaniżi nvadew il-pitch hekk kif ipprotestaw li x-xutt mid-distanza ta’ Busuttil kien ħabat mal-ħabel tal-lasta u baqa’ sejjer barra. F’dak iż-żmien, il-lasta l-mimduda ma kinitx għadha teżisti u minflokha kienu jagħmlu ħabel li kien jintrabat maż-żewġ lasti. Barra minn hekk, ix-xbieki mal-lasti ma kinux jeżistu.
Wara li l-Pulizija b’xi mod ikkalmat is-sitwazzjoni, ir-referee kien lest li jkompli l-logħba iżda Floriana riedu jibdlu r-referee. Meta deher ċar li r-referee ma setax jinbidel, il-plejers ta’ Floriana ħarġu barra mill-pitch u l-logħba ġiet abbandunata. St. George’s ġew iddikjarati rebbieħa. Bil-flus li rebħu mill-imħatra, St. George’s xtraw trofew tal-fidda u semmewh ‘The Floriana Cup.’ Din il-logħba kienet meqjusa l-ewwel logħba kbira tal-futbol Malti.
