L-eks Kummissarju tal-Pulizija Lawrence Cutajar, qed jitħallas aktar minn €30,000 bħala konsulent tal-Ministru Byron Camilleri fi ħdan il-Ministeru għall-Intern.
Dan żvelah id-Deputat Parlamentari Nazzjonalista Karol Aquilina fejn fuq il-midja soċjali ppublika l-kuntratt tal-eks kummissarju. Huwa sostna li dan huwa l-prezz li l-poplu Għawdxi u Malti qed iħallas mit-taxxi tiegħu “sabiex l-eks Prim Ministru Joseph Muscat u l-Prim Ministru Robert Abela jżommu lil Lawrence Cutajr taħt il-kontroll tagħhom”.
Huwa kien il-ħames Kummissarju tal-Pulizija fi 3 snin taħt Gvern Laburista mmexxi minn Joseph Muscat. Taħt it-tmexxija ta’ Lawrence Cutajar, ir-reputazzjoni investigattiva tal-Korp spiċċat taħt dell ikrah b’rabta mal-każijiet tal-Bank Pilatus, il-Panama Papers, u l-assassinju ta’ Daphne Caruana Galizia.
Huwa ta r-reżenja tiegħu fis-17 ta’ Jannar, 2020, erba’ t’ijiem wara li Robert Abela nħatar bħala s-suċċessur ta’ Joseph Muscat. Ftit tal-jiem wara, inkixef l-iskandlu fi ħdan is-sezzjoni tat-traffiku tal-Korp tal-Pulizija, skandlu li kien qed jitwettaq waqt li Cutajar kellu f’idejh it-tmun tal-Korp.
S’issa, wara kważi ħames xhur, il-Korp tal-Pulizija għadu qed jopera mingħajr Kummissarju.
