Wara li l-Ħamis li għadda ħareġ ir-rapport tal-Kummissarju għall-Istandards fil-Ħajja Pubblika li kixef kif erba’ Ministri: Silvio Schembri, Aaron Farrugia, Ian Borg u Edward Scicluna għamlu użu ħażin mill-fondi pubbliċi, id-diskussjoni dwar dan issoktat anki fuq Net Live, bil-Kap Ezekuttiv ta’ LovinMalta, Chris Peregin, jagħti dettalji tal-flus li possibilment intefqu.
Tul l-intervista Peregin qal li ġejna f’sitwazzjoni fejn il-qarrejja qed ikunu żgwidati.
Chris Peregin spjega għaliex l-aġenzija li jmexxi hu talbet din l-informazzjoni, u għaliex intalbet li ssir l-investigazzjoni mill-Kummissarju Hyzler.
Huwa insista illi jeħtieġ li din l-informazzjoni tibqa’ tiġi segwita.
Fl-aħħar jiem il-Kap tal-PN Adrian Delia qal li l-Ministri għandhom iżommu l-irwoli tagħhom ta’ membri parlamentari u membri ta’ partit politiku totalment separati filwaqt li talab ukoll biex il-Pulizija tinvestiga dan l-abbuż ta’ fondi pubbliċi mingħajr dewmien.
It-Tnejn li għadda fil-Parlament, il-Ministri tal-Gvern baqgħu totalment siekta dwar dan l-iskandlu, bil-Kap tal-PN jinsisti li l-membri tal-Kabinett iridu jroddu lura l-flus li serqu.
