L-Unjoni tal-Cabin Crew (UCC) waqqfet in-negozjati mal-Air Malta wara l-U-Turn tal-Kumpanija u insistenza li terġa’ timpjega 145 persunal tal-Cabin Crew għal żmien fiss.
Il-UCC sejħet dan l-atteġjament mill-Air Malta bħala U-Turn li l-union qieset bħala manuvra politika, gimmick intenzjonat biex jispiċċaw mingħajr xogħol jew b’inqas paga ħaddiema li ilhom jagħtu servizz lil-linja nazzjonali għal għexieren ta’ snin. Il-UCC qalet li l-Air Malta insistiet li żżom l-impjieg ta’ 145 Cabin Crew fuq kuntratt definit biex tagħmilha faċli għall-kumpanija biex tnaqqas il-pagi b’mod permanenti u biex tagħmel tibdiliet fil-Ftehim Kollettiv kurrenti li fil-passat kien iffirma missier il-Prim Ministru Robert Abela.
Il-UCC temmen li l-insistenza tal-Air Malta biex terġa’ ddaħħal impjegati għal żmien fiss ma tagħmel l-ebda sens ekonomiku, tmur kontra t-talbiet tal-kumpanija għal miżuri aggressivi li jnaqqsu l-ispejjeż biex tevita t-tkeċċijiet kollettivi u qed tabbuża minn persuni vulnerabbli li se jkunu sfruttati mill-kumpanija biex hi tilħaq l-iskopijiet tagħha.
Fi stqarrija il-UCC stqarret li “kienet u tibqa’ impenjata biex tissalvagwardja l-impjieg tal-impjegati KOLLHA.” Madankollu, mhux se tippermetti lill-Air Malta jew lill-Gvern jabbużaw minn din il-pandemija biex jieħdu vantaġġ minn persuni li għal snin twal kienu ta’ servizz għal-linja nazzjonali tal-ajru.
Il-UCC tappella lill-Kumpanija u lill-Gvern biex jaraw is-sens komun u jaċċettaw proposti għal pakkett li jippermetti lill-kumpanija rkupru deċenti maż-żmien, iżda li tippermetti lill-impjegati jirkupraw parti ġusta mit-telf tagħhom jekk u meta l-industrija tirkupra.
Il-UCC tinsab ixxukkjata b’din il-manuvra u tinsab diżappuntata għall-fatt li l-membri tagħha ġew abbandunati mill-Gvern meta huma fl-iktar livell dgħajjef tagħhom.
Fl-istess stqarrija il-UCC fakkret lill-Gvern dwar il-garanziji kuntrattwali mwiegħda lill-ekwipaġġ tal-kabina li jibqgħu vinkolanti u eżegwibbli. In-nuqqas tal-Gvern li jintervjeni u li jżomm il-garanziji tiegħu ġie mgħajjat għall-attenzjoni tal-Gvern reċentement fi Protest Ġudizzjarju ppreżentat fil-Qrati.
