Il-Prim Ministru Iżraeljan, Benjamin Netanyahu ippreżenta lill-Gvern ġdid għall-Għaqda lill-Parlament biex ikkonkluda aktar minn sena ta’ staġnar politiku. Il-pass ittieħed meta Netanyahu qed iħejji biex, fil-jiem li ġejjin, jiddefendi ruħu l-qorti quddiem allegazzjonijiet ta’ korruzzjoni.
Il-ftehim għall-qsim ta’ poter ma’ Benny Gantz, rivali politiku li jmexxi lill-Partit tal-Blu u Abjad (tal-lemin), iwitti t-triq biex Netanyahu jipproċedi lejn sitwazzjoni fejn jista’ jgħaqqad partijiet tax-Xatt tal-Punent okkupat ma’ Iżrael.
Il-pjan għandu jipproċedi skont il-wiegħda inizjali u meta l-Palestinjani qed jinsistu biex ix-Xatt tal-Punent jifforma parti minn Stat tal-Palestina tal-futur.
Skont il-ftehim li laħaq ma’ Gantz (wara tliet elezzjonijiet ġenerali inkonklussivi), Netanyahu għandu jkompli bħala Prim Ministru Iżraeljan għal 18-il xahar. Ladarba jgħaddi t-terminu, Netanyahu jgħaddi r-riedni lil Gantz, eks kap tal-qawwiet armati Iżraeljani u li għalissa se jkun il-Ministru Iżraeljan responsabbli mid-Difiża.
Meta kellem lill-Parlament Iżraeljan, Netanyahu qal li ‘in-nies riedu l-għaqda u minn issa ‘il quddiem, huma jistgħu jserrħu rashom dwar dan’. Dan meta fl-aħħar ġimgħat spikkat ir-rieda li l-Iżraeljani jevitaw raba’ elezzjoni wara t-tliet elezzjonijiet inkonklussivi li saru minn April tal-2019, ‘il hawn.
Benjamin Netanyahu, li għandu 70 sena, hu l-aktar mexxej Iżraeljan li qatt dam fil-poter mindu laħaq Prim Ministru għall-ewwel darba fl-1996. Il-Kabinett ġdid tiegħu, magħmul minn 36 Ministri, hu l-akbar fl-istorja ta’ Iżrael.
Fl-24 ta’ Mejju, Netanyahu irid iwieġeb fil-qorti għal akkużi ta’ tixħim, frodi u abbuż tar-responsabbiltà fdata lilu – u meta hu qiegħed jiċħad għal kollox.
//= $special ?>