Telefon ċellulari ‘locked’ li jista’ jwassal għal aktar informazzjoni fuq każ ta’ pjan biex jiġi mpurtat velenu u splussiv qed jiġi nvestigat minn espert Amerikan.
Dan ħareġ meta kompliet il-kumpilazzjoni fil-konfront ta’ Jomic Calleja Maatouk ta’ 34 sena minn Ħaż-Żebbuġ, akkużat taħt il-liġijiet ta’ kontra t-terroriżmu li ftiehem biex jimporta veleni bħal Ricin u Polonium kif ukoll splussiv C4 f’Malta, kompliet fil-Qorti.
Huwa kien ġie arrestat bħala parti mill-investigazzjoni tal-Pulizija, wara li l-awtoritajiet Maltin ġew avżati mis-servizzi tas-sigurtà barranin li persuni mhux magħrufa kienu qed jippruvaw jixtru Polonium 210, Ricin u Fentanyl minn web site li ma tinqabadx minn ‘search engines’.
Il-Maġistrat Donatella Frendo Dimech semgħet lill-Ispettur tal-Pulizija Omar Zammit mit-Taqsima kontra t-Terroriżmu tal-Pulizija jixhdu, fejn taw dettalji dwar l-investigazzjoni dwar l-operazzjonijiet ta’ Calleja Maatouk.
Ħareġ minn din ix-xhieda li t-telefon ċellulari ‘locked’ tal-akkużat huwa f’idejn espert Amerikan li qed janalizza data meħuda mill-apparat. Dan l-esperi se jkun qed jixhed permezz ta’ video conferencing f’seduta futura.
L-akkużat qal lill-avukat tiegħu li kien lest li jċedi l-password tal-mowbajl, iżda l-Prosekuzzjoni qalet li dan ma kienx meħtieġ f’dan l-istadju peress li l-mowbajl kien diġà nfetaħ.
Surġent tal-Pulizija mid-Dipartiment ta’ Kontra t-Terroriżmu esibixxa kaxxa kbira tal-kartun li fiha amplifikatur tal-kitarra vojta li moħbi fiha kien hemm stikka ta’ splussiv falz li kienet ġiet skambjata mill-Pulizija bħala parti minn operazzjoni ta’ kunsinna kkontrollata.
Is-Surġent qal lill-Qorti li kien mar personalment fil-Bażi Luke Airforce ta’ Phoenix, Arizona biex josserva l-operazzjoni ta’ tpartit fuq ġewwa tal-bunker hemmhekk. Huwa qal li l-isplussiv li tneħħa ġie ttestjat u li kien C4.
Waqt l-interrogazzjoni inizjali tiegħu, Calleja Maatouk kien irrifjuta li jagħti l-password tiegħu. “Lanqas ma nagħti l-password tiegħi lil ommi,” huwa kien ikkwotat li qal, hekk kif id-difiża qalet li l-akkużat kien għen lill-Pulizija fl-investigazzjonijiet tagħhom.
Is-Supretendent George Cremona, ikkonferma li l-akkużat kien irrifjuta li jċedi l-passwords meta mitlub. L-avukat tad-Difiża Benjamin Valenzia għamel enfasi kbira fuq l-argument li l-akkużat issa kien qed jikkopera.
Il-Maġistrat Frendo Dimech qalet li kienet qed tieħu nota ta’ dawn is-sottomissjonijiet, iżda rrimarkat li “l-kooperazzjoni kellha tkun mill-ewwel ġurnata”.
Il-Qorti semgħet ukoll l-argumenti dwar il-ħelsien mill-arrest, wara li saret talba f’dan is-sens mid-difiża. l-Avukat Valenzia qal li ma kienx ċar jekk hemmx xi xhieda pajżana li għad iridu jixhdu.
Fit-tweġiba, l-Ispettur Zammit spjega lill-Qorti li kien għad hemm xhud wieħed, il-missier bijoloġiku tal-akkużat, li wkoll kien vulnerabbli minħabba li ma jiflaħx.
Il-Qorti ordnat li r-raġel jitħalla jixhed permezz ta ’video-conference’ jekk ikun meħtieġ. It-talba tal-ħelsien mill-arrest kellha tiġi deċiża in camera. Il-każ mistenni jkompli f’Ġunju
