Raġel ta’ 43 sena li nqabad bid-droga f’Ħal Tarxien ġie kundannat 18-il xahar ħabs wara li ammetta li kellu d-droga eroina u kokaina mhux biss għal użu personali. Wara kienu arrestati erba’ rġiel oħra.
Kien fl-aħħar sigħat, li l-Pulizija mill-Iskwadra ta’ Kontra d-Droga wettqu tliet operazzjonijiet b’rabta ma’ investigazzjonijiet dwar traffikar ta’ droga, fejn ġew arrestati ħamet irġiel.
Fl-ewwel ħidma, f’Ħal Tarxien, raġel ta’ 43 sena kien arrestat wara li l-Pulizija osservatu jgħaddi b’mod suspettuż sustanzi lil persuni oħra. Il-Pulizija arrestat lir-raġel u minn tfittxija li saret fil-vettura li kien qiegħed isuq u minn tfittxija li saret fuqu, huwa nstab fil-pussess ta’ diversi pakketti li fihom kien hemm sustanza suspettata droga kokaina u eroina.
Ir-raġel tressaq quddiem il-Maġistrat Dr Donatella Frendo Dimech akkużat bi traffikar u pussess ta’ droga kif ukoll li huwa reċediv. Huwa ammetta l-akkużi kollha miġjubin kontrih u ġie kkundannat 18-il xahar ħabs u mmultat €500. Il-ħidma tal-Pulizija kompliet f’Bormla.
Hija kellha informazzjoni dwar movimenti suspettużi ta’ vettura li fiha kien hemm żewġ persuni. Il-vettura twaqqfet mill-Pulizija u kienu arrestati raġel ta’ 23 sena u ieħor ta’ 33 sena.
Minn tfittxija li saret, huma nstabu fil-pussess ta’ sustanzi suspettati kannabis u kokaina. Minn aktar investigazzjonijiet, il-Pulizija kompliet issegwi vettura oħra, din id-darba fil-Kalkara.
Wara li waqfuha, saret tfittxija fiha u fuq iz-żewġt irġiel li kienu fiha – raġel ta’ 30 sena u ieħor ta’ 37 sena – u nstabu fil-pussess ta’ sustanzi suspettati cannabis u kokaina. L-investigazzjonijiet fil-konfront ta’ dawn l-erba’ persuni għadhom għaddejjin u mistennija jitressqu l-Qorti fil-futur qarib.
