Żagħżugħ ta’ 33 sena qed jissielet għal ħajtu wara li waqa’ minn għoli ta’ madwar żewġ sulari f’residenza f’Ħal Luqa.
Mill-ewwel investigazzjonijiet tal-Pulizija jirriżulta li fir-residenza – li tinsab fi Triq il-Parroċċa – kien qed isir xi xogħol.
Madankollu, għall-ħabta tal-10am, għal xi raġuni ż-żagħżugħ waqa’ mill-għoli f’żona oħra tar-residenza, li għadu kif xtara u qed jirranġa.
Minbarra l-Pulizija, fil-post wasal ukoll tim mediku b’Ambulanza, biż-żagħżugħ ittieħed l-Isptar Mater Dei għal aktar kura. Hemm, hu kien iċċertifikat li qed issofri minn feriti serji u li jinsab fil-periklu li jitlef ħajtu.
Bil-każ ġiet infurmata l-Maġistrat tal-għassa Astrid May Grima, li ħatret diversi esperti biex jassistuha bl-Inkjesta, filwaqt li aktar investigazzjonijiet qed jitmexxew mill-Pulizija mid-Distrett.
