Tewmien Bormliżi ġew kundannati seba’ snin u tmien xhur ħabs bejniethom wara li ammettew li wettqu diversi hold-ups bl-armi fuq anzjani li għandhom 87, 82, 77, 65 u 64 sena.
Paul Scicluna ġie kkundannat 54 xahar ħabs filwaqt li ħuh Roderick Scicluna ġie kundannat 38 xahar ħabs wara li ammettew li bejn it-28 ta’ Diċembru 2019 u t-18 ta’ Jannar 2020 wettqu tliet hold-ups bl-armi, u attakk vjolenti fuq anzjani.
Il-Qorti preseduta mill-Maġistrat Donatella Frendo Dimech qalet li Il-Qorti kkunsidrat in-natura serja tar-reati li dwarhom qed tinstab ħtija. Qalet li dawn huma reati koddardi mwettqa fuq min hu l-aktar vulnerabbli.
Fuq anzjani li ftit li xejn ikollhom kapacità joffru rezistenza, u dan sabiex jiffinanzjaw il-vizzju qerriedi tad-droga. Il-Qorti qiset l-ammissjoni ferm bikrija tagħhom kif ukoll il-kollaborazzjoni tagħhom fil-kors tal-investigazzjonijiet kondotti mill-Pulizija.
Ittieħdet konsiderazzjoni wkoll tal-kondotta mtappna tal-ħatja, l-aktar ta’ Paul Scicluna minn fejn jirriżulta li fl-2018, f’żewġ okkażżjonijiet separati, ġie kkundannat wkoll għal-reati ta’ serq fejn anke ngħata sentenzi ta’ priġunerija.
It-tewmien ammettew ukoll li ppruvaw jiġbdu l-flus iżda ma rnexxielhomx minn żewġ karti ta’ krediti, mhux propjetà tagħhom u nstabu ħatja li saqu karozza bla liċenzja.
Paul Scicluna ammetta wkoll li fi tliet okkażjonijiet issekwestra persuni kontra l-volontà tagħhom, u li ġarr fuqu arma bla liċenzja, u li sar ukoll reċediv. L-Ispettur Fabian Fleri qal fil-Qorti kif l-investigaturi f’dan il-każ għall-ewwel stħarrġu reati ta’ żewġ serqiet bl-armi fuq banka tal-lottu f’perjodu ta’ 10 t’ijiem, f’Jannar li għadda.
Kien nhar it-8 ta’ Jannar 2020, għall-ħabta tal-5.00pm. minn l-Banka tal-Lottu li tinsab fi Triq San Girgor, iż-Żejtun ikkommettew serq ta’ flus kontanti, liema serq hu kkwalifikat bil-vjolenza diretta fuq anzjana ta’ 64 sena, u dan għad-dannu tas-sidien tal-imsemmija banka
Nhar it-18 ta’ Jannar 2020, għall-ħabta tal-11:00am. mill-istess Banka tal-Lottu kkommettew delitt ta’ serq ikkwalifikat, bil-vjolenza diretta fuq anzjana ta’ 65 sena, li iżda liema delitt ma ġiex esegwit minħabba xi ħaġa indipendenti u aċċidentali mil-volontà tagħhom.
Filmati mis-CCTV mix-xena tar-reat urew li kienet qed tintuża karozza Volkwagen Golf bil-pjanċi tar-reġistrazzjoni ta’ Roderick Scicluna. Din l-evidenza tagħat dawl għall-investigazzjoni fuq żewġ inċidenti li kienu seħħew fl-10 ta’ Jannar.
Kien hemm ukoll l-involviment ta’ anzjana ta’ 77 sena minn Ħal Tarxien, li t-tewmien serqulha l-handbag għall-ħabta tal-9.45am. Ftit anqas minn siegħa wara, anzjana ta’ 82 sena, għaddiet mill-istess esperjenza qarsa f’Raħal Ġdid.
Sadanittant fl-10 ta’ Jannar, 2020, għall-ħabta ta’ 10:30am fi Triq il-Belt Valletta, f’Paola ikkommettew serq ta’ basket minn fuq anzjana ta’ 82 sena. Ftit tal-ħin wara, t-tewmien ippruvaw jiġbdu xi flus mill-ATM minn bank fiż-Żejtun, minn card li kienet instabet f’wieħed mill-handbags tal-anzjani.
Id-deskrizzjoni ta’ wieħed mill-ħallelin, qalet il-Prosekuzzjoni qablet ma’ dak li kien żamm anzjan ta’ 87 sena, f’garaxx fiż-Żejtun fejn kienet tpoġġiet ukoll sikkina ma’ għonqu, liema każ kien seħħ fit-28 ta’ Diċembru li għadda għall-ħabta tas-6.15pm. bil-ħalliel jisraq madwar 200 ewro fi flus kontanti.
Il-Qorti qiset dak li qal l-Avukat Difensur Carmelo Mifsud Bonnici dik li Roderick Scicluna ġie mħajjar iwettaq dawn ir-reati minn ħuh Paul li kien il-moħħ wara dan l-agir hekk deplorevoli.
Madanakollu, qalet il-Qorti, jibqa’ l-fatt li Roderick mhux xi tifel jew xi baħbuħ iżda raġel adult ta’ xejn anqas minn 40 sena u għalhekk kapaċi li jaħseb b’moħħu u jaġixxi għal rasu mingħajr ħtieġa ta’ suġġerimenti jew imbottaturi.. L-Ispetturi Fabian Fleri, Lydon Zammit u Paul Camilleri mexxew il-Prosekuzzjoni.
