Il-klabb tal-Ewwel Diviżjoni Qrendi ħareġ stqarrija biex jiċħad xnigħat fil-media soċjali li mhux minnu li ma ridux li jkunu promossi fil-Kampjonat Premier. Fil-Klassifika tal-Ewwel Diviżjoni qabel ma waqaf il-kampjonat, Qrendi kienu jinsabu fit-tielet post b’35 punt, punt taħt Lija Athletic u tliet punti taħt Żejtun Corinthians.
Kieku l-kampjonat tkompla b’mod normali u Qrendi temmew fit-tielet post, kienu jilagħbu l-play-off mat-tielet tim mill-aħħar tal-Kampjonat Premier. Wara li ttieħdu d-deċiżjonijiet kollha mill-Eżekuttiv u l-Kunsill tal-MFA, Qrendi ġew ikklassifikati fit-tielet post iżda se jibqgħu fl-Ewwel Diviżjoni, biż-żewġ timijiet ta’ fuqhom jiksbu l-promozzjoni.
“Il-klabb jaċċetta d-deċiżjoni jittieħdet fil-Kunsill tal-MFA lbieraħ u għalkemm il-kumitat jinsab iddiżappuntat li għal dan l-istaġun bqajna b’xiber imnieħer wara l-investiment kollu li sar, inħarsu ‘l quddiem għall-istaġun li ġej bit-tama li ma ndumux ma nkunu mal-aqwa timijiet f’pajjiżna,” qalet parti mill-istqarrija tal-klabb. Promozzjoni għal Qrendi għall-Kampjonat Premier kienet tkun l-ewwel darba fl-istorja tal-klabb.
