Il-Qorti tal-Appell Kriminali kkonfermat deċiżjoni ta’ ġurija li Michael Emmanuel mill-mill-Kosta tal-Avorju ma kienx fi stat ta’ ġenn meta allegatament huwa qatel lill-għarusa tiegħu Maria Lourdes Agius.
Emmanuel ta’ 29 sena huwa akkużat li qatel lill-eks sieħba tiegħu billi fgaha b’kurċifiss, u li weġġa’ lil ommha, li m’obdiex l-ordnijiet tal-pulizija u li ffalsifika l-karta ta’ identità tiegħu. Agius kellha sebat itfal, wieħed minnhom tal-akkużat. Kienet ommha li sabitha mejta f’sodditha fl-14 ta’ Settembru 2018 f’Raħal Ġdid.
Il-Qorti tal-Appell preseduta mill-Prim Imħallef Mark Chetcuti u l-Imħallfin Joseph Zammit McKeon u Edwina Grima ddikjaraw li l-ġurija li kienet qed tisma’ l-każ ta’ Michael Emmanuel fil-ġurin li kien intemm fil-5 ta’ Lulju li għadda kienet korretta meta skartat it-talba tal-akkużat biex jinħeles fuq bażi ta’ insanità.
Fid-deċiżjoni tagħha l-Qorti qalet li r-rapport tal-patoloġisti u tal-espert mediku-legali Mario Scerri jikkonfermaw li l-vittma mietet fgara permezz ta’ strangulazzjoni manwali. Id-dekrizzjoni medika ta’ kif mietet indikaw li hija kienet fgata permezz ta’ żewġ idejn b’forza kbira u li għaddiet minn trawma kbira.
Hija qalgħet ukoll daqqiet fuq wiċċha u f’partijiet oħra ta’ ġisimha, li rriżultaw fi brix konsiderevoli, l-aktar fin-naħa ta’ għonqa. Kellha wkoll diversi marki fejn ħalqa, u li dawn saru minħabba pressjoni kbira li saret fuq wiċċha u li dawn kollha saru waqt li hija nqatlet.
Dwar jekk hux minnu li ntuża xi salib waqt li hija kienet qed tiġi fgata, l-espert Scerri kien wieġeb fin-negattiv, fejn qal li kieku dan kien il-każ, kien ikun hemm marki viżibbli li jirreltaw ma’ dan l-oġġett.
Huwa qal li l-vittma kienet qalgħet daqqiet fuq rasha b’oġġett ċatt. Qal ukoll li l-vittma spiċċat u li kienet intilfet minn sensiha qabel ma spiċċat fgata.
Il-Qorti kkunsidrat ukoll il-fatt li Emmanuel għandu storja ta’ vjolenza domestika li kienu ġew rappurtati lill-Pulizija, u għaldaqtant huwa fin-natura tiegħu huwa persuna vjolenti.
Sadanittant ħadd mill-uffiċjali tal-Pulizija li xehedu ma qalu li Emmanuel, kif qed jgħid issa li kien qed jara xi delużjonijiet wara li kkommetta r-reat, anzi qalu li dejjem rawh fi stat tajjeb meta kellmuh.
Finalment anke il-ġurati kellhom jaċċettaw li Maria Lourdes Agius mietet kif iddeskrieva l-akkużat, madankollu dan kollu ma kienx sostnut b’mod xjentifiku.
Emmanuel kien qal li huwa għamel dak li qaltlu hi u li wara li poġġiet is-salib fuq għonqha, qaltlu biex jagħfsu magħha. Emmanuel għafas bil-mod fuq il-kurċifiss, imma Maria Lourdes ma reġgħetx qamet. “Bdejt nibża’. Bdiet tgħid xi ħaġa u għattiet wiċċha b’liżar. Kompliet titħabat ftit ieħor u mietet,” kien iddikjara l-akkużat waqt l-interrogazzjoni.
Emmanuel kien qal ukoll li Maria Lourdes kienet tħobbu ħafna.Qal li f’dak il-lejl kienet qaltlu li t-tarbija z-zgħira ma kinitx minn tiegħu. Qaltu li kienet taf li sar iħobb mara oħra minn Marsaxlokk u kienet tħoss li hija ostaklu għalih. Ir-relazzjoni bejn l-akkużat u l-vittma kienet bdiet f’appartament li kellu l-akkużat f’San Ġiljan.
Il-Qorti kienet ħalliet lil Michael Emmanuel jappella d-deċiżjoni mill-ġurin li ċaħdet il-motiv ta’ ġenn wara li l-Avukat Ġenerali oġġezzjona għal li jsir appell minn dan il-każ.
Il-Qorti kienet qalet li l-unika darba meta applikazzjoni għal appell tista’ tiġi ddikjarata nulla hija meta ma tkunx iffirmata minn avukat jew mill-appellant innifsu. Kieent qalet li tinsab perplessa li l-Avukat Ġenerali ma rnexxilux jifhem in-natura tal-appell u l-bażi legali għat-talba tal-appellant.
L-akkużat kien ukoll intbagħat l-Isptar Monte Karmeli f’April tal-2018 wara li hu stqarr li ma kienx stabbli mentalment meta wettaq ir-reat. Il-Prosekuzzjoni insistiet li Emmanuel kien konxju meta qatel lil Maria Lourdes, u kellu wkoll ċans biex jaħseb fuq dak li għamel.
Il-ġurija kienet iddeċidiet dan il-każ li kien instema mill-Imħallef Consuelo Scerri Herrera bi tmien voti, kontra wieħed. Għaldaqstant issa tista’ tkun deċiża d-data ta’ meta se jibda jinstema l-ġuri.
Qabel kienu daħlu jiddeliberaw l-Imħallef Consuelo Scerri Herrera kienet qalet lill-ġurati biex jifhmu li mhux kull tip ta’ mard mentali iwassal għal stat ta’ insanità, kif definita bil-liġi.
